Trupi i djegur i gjetur brenda një makine në Fushë-Krujë, mendohet se i përket një 57 vjeçari nga Kosova, i identifikuar si Xhafer Osmani.

Policia e Kosovës ka deklaruar se familjarët e tij e kanë denoncuar se kishte humbur, ndërsa Osmani, rezulton se është futur në Shqipëri në 29 prill 2018, shkruan Lapsi, transmeton Klan Kosova.
Policia pohon se mbeten në pritje të rezultateve të ADN-së, për t’i ballafaquar me ato të familjes së tij.

Burime thonë se ngjarja është drejt zbardhjes së plotë, ndërsa “Panorama” raporton se paraprakisht dyshohet se viktima kishte një lidhje dashurie me një femër në Fushë-Krujë.

Makina me targë të Kosovës 02 960 SN hyri në Shqipëri përmes pikës kufitare të Morinës më 29 prill. Sot, më 5 maj, automjeti u gjet i shkrumbuar mes barishteve në një tokë, në fshatin Derven të Fushë-Krujës, rreth 250 metra larg rrugës kryesore të automjeteve.

“Për momentin jemi duke bashkëpunuar me policinë e Kosovës, e cila na ka konfirmuar të na sjellë informacion dhe kampione biologjike të familjarëve të Xhafer Osmanit, me qëllim kryerjen e analizave të ADN për identifikimin e trupit të djegur plotësisht” – tha një burim nga policia.

Policia dyshon se bëhet fjalë për një vrasje e më pas djegie të automjetit me trupin brenda, për të fshehur gjurmët.
Në një prononcim që pati më herët me Express, drejtori i Policisë së Durrësit, Alfred Çepe, tha se policia dhe prokuroria e Durrësit është duke bashkëpunuar me autoritetet e Kosovës, për shkak se lidhja e vetme që bëhet me këtë shtet janë targat.

“Specialistët për Krimet në bashkëpunim me Prokurorinë e Rrethit Gjyqësor Krujë po punojnë për identifikimin e personit të djegur dhe zbardhjen e plotë të shkaqeve të ngjarjes”, tha Policia në një njoftim paraprak.

Nuk dihet ende nëse personi është vrarë më parë me armë zjarri, apo nëse është djegur i gjallë brenda automjetit. Ekspertiza mjeko-ligjore pritet të hedhë dritë mbi ngjarjen, transmeton Klan Kosova.