Një vaksinë kundër Coronavirusit që po zhvillohet në Britani të Madhe po tregon shenja pozitive që mund të funksionojë pasi provat zbuluan se pjesëmarrësit po krijojnë qeliza që mund të shkatërrojnë sëmundjen.

Kështu shkruajnë mediet britanike, sipas të cilave, ekipi i shkencëtarëve në Oksford tashmë ka thënë se ata janë 80 për qind të sigurt se mund të kenë një të tillë në dispozicion deri në shtator, me më shumë lajme të mira që priten këtë javë në The Lancet.

Madje, siç shkruan Daily Mail, sot ka dalë që provat kanë zbuluar se vaksina po provokon një reagim të antitrupave në trup dhe të qelizave T thelbësore që do të shkatërrojnë virusin në trup.

Sipas asaj që thuhet më tej, rreth 8,000 britanikë po marrin pjesë në një testim të madh të vaksinës së Oksfordit, e cila është duke u prodhuar nga firma farmaceutike AstraZeneca.

Por, ndërsa normat e Coronavirusit kanë rënë në këtë vend, studiuesit gjithashtu synojnë të vaksinojnë 4,000 individë në Brazil dhe 2,000 në Afrikën e Jugut.

Sipas mediumit në fjalë, një vaksinë kundër Coronavirusit duhet të zgjasë të paktën për disa vjet, ka thënë shkencëtarja britanike, vetë projekti i vaksinave i së cilës është projekti global i parë i zbuluar në fillim të këtij muaji, përcjell Telegrafi.

Sarah Gilbert u tha deputetëve se ishte optimiste se një vaksinë do të sigurojë “një kohëzgjatje të mirë të imunitetit”.

Ajo është eksperte me famë botërore që drejton një ekip të Universitetit të Oksfordit, duke krijuar një vaksinë, kështu që pretendimi i saj mund të ndihmojë në “heqjen e dilemave” se sa mund të zgjasë mbrojtja ndaj COVID-19.

Shqetësimet ishin ngritur pasi ato që kishin lloje të tjera të Coronavirusit – të cilat janë më pak të rrezikshëm dhe shkaktojnë ftohjen e zakonshme – ishin në gjendje, në teste, të riktheheshin brenda një viti.

Pyetja kryesore është nëse vaksina do t’i mbrojë ata nga infektimi, apo thjesht t’i bëjë ata më pak të sëmurë.

Ajo thuhet se mund të funksionojë edhe më pak te njerëzit e moshuar sepse sistemet e tyre imunitare janë më të dobëta.