Në Kompleksin Përkujtimor në Reçak, është bërë zbulimi i shtatores së ish-ambasadorit William Walker. Në këtë ceremoni ishte i pranishëm edhe presidenti i vendit Hashim Thaçi, si dhe personalitete tjera politike, por edhe qytetarë të shumtë, raporton Ekonomia Online.

Banorët e këtij fshati, por edhe të tjerët do të kenë mundësi që të “bashkëjetojnë” me njeriun që me deklaratën e tij ndryshojë qasjen e botës karshi Kosovës, që në atë botë po masakrohej nga forcat serbe të udhëhequra nga Slobodan Milosheviqi.

Walker është shprehur shumë i lumtur me shtatoren duke thënë se nuk e kishte menduar se ajo do të ishte kaq madhështore.

Ai ka shtuar se skulptura me figurën e tij nuk paraqet vetëm atë, por gjithë çfarë ka ndodhur në Reçak, sepse siç ka pohuar miku i madh i Kosovës, “emri im është i lidhur ngushtë me masakrën e Reçakut”.

“Edhe pse sot është një mot me shi, në fytyrat e banorëve të Reçakut po shoh buzëqeshje, përkundër ditës kur kishte ndodhur masakra ku nuk mund të shihje asnjë të vetme buzëqeshje”, ka thënë Walker.

Thaçi: Shtatorja e Walker në Reçak, simbol i lirisë dhe pavarësisë së Kosovës

Presidenti i Republikës së Kosovës, Hashim Thaçi, sot ka bërë homazhe në Kompleksin Përkujtimor në Reçak dhe ka zbuluar shtatoren e ish-ambasadorit William Walker në këtë fshat.

Presidenti Thaçi tha se në Reçak kishte ndodhur ajo që më së paku ishte pritur të ndodhte, por, sipas tij, krejt bota pastaj e pa sesi në Kosovë po ndodhte gjenocidi i shtetit të Serbisë mbi popullatën e pafajshme.

“Gjenocidi i shtetit të Serbisë mbi popullatën e pafajshme ia hapi sytë gjithë diplomacisë botërore”, ka thënë ai.

Presidenti Thaçi theksoi se Shtetet e Bashkuara e kishin thënë të vërtetën e tyre, NATO-ja asokohe po përgatitej për aksion kundër forcave të ushtrisë dhe policisë serbe, si dhe organizata të ndryshme ndërkombëtare kishin filluar t’i shikonin nga afër zhvillimet në Kosovë.

“Në kuadër të këtyre organizatave ndërkombëtare ishte njeriu i duhur, në emër të shtetit të duhur, pra ambasadori William Walker, me mbështetje të fuqishme të Shteteve të Bashkuara të Amerikës”, u shpreh presidenti Thaçi.

“Walker ishte njeriu i duhur që tha të vërtetën, e cila ia hapi sytë botës dhe bota menjëherë thirri konferencën në Rambuje”, shtoi presidenti Thaçi.

Ai theksoi se jo vetëm tash pas 18 vjetëve, por gjithmonë do të kujtohen viktimat dhe heroizmi i pashoq i popullatës shqiptare, bashkë me përpjekjet madhore dhe unike të popullit të Kosovës.

“Sot çdo qytetar i vendit duhet të ndihet mirë, kudo që jeton në Kosovë e diasporë, sepse ka atributet e një çlirimtari”, theksoi presidenti Thaçi.

 Gjithashtu, i pari i vendit tha se të gjithë duhet të punojmë për të ardhmen e vendit, që Kosova të jetë sa më shpejtë pjesë e NATO-s dhe Bashkimit Evropian, si dhe t’i kultivojmë raportet e përjetshme me Shtetet e Bashkuara të Amerikës.

 “Shtetet e Bashkuara të Amerikës gjithmonë ishin dhe mbeten përkrah Kosovës”, u shpreh presidenti Thaçi.

 Para zbulimit të shtatores së ish-ambasadorit amerikan, William Walker, presidenti Thaçi e falënderoi atë për kontributin e tij për lirinë e Kosovës dhe për praninë e sotme në Reçak, duke theksuar se shtatorja e tij simbolizon të vërtetën për Kosovën para botës dhe përfaqëson simbolin e lirisë dhe të pavarësisë.

 Ngjarja e 15 janarit të vitit 1999, e njohur si masakra e Reçakut, njihet si një nga ngjarjet që ka shënuar kthesë në diplomacinë ndërkombëtare në raport me Serbinë dhe Kosovën, duke u paraprirë proceseve që çuan deri te fushata e bombardimeve të NATO-s kundër caqeve ushtarake të Serbisë.

Ambasadori William Walker, e pati cilësuar këtë masakër si “krim kundër njerëzimit”.