Siria është dakordësuar për t’u bashkuar me koalicionin ndërkombëtar të udhëhequr nga Shtetet e Bashkuara për të luftuar grupin e armatosur ISIS.

Njoftimi, i bërë nga Ministri Sirian i Informacionit Hamza al-Mustafa dhe zyrtarë amerikanë, erdhi menjëherë pasi Presidenti sirian Ahmed al-Sharaa mbërriti në Uashington dhe u prit në Shtëpinë e Bardhë nga Presidenti Amerikan Donald Trump të hënën.

Al-Mustafa tha se një “deklaratë bashkëpunimi politik” e nënshkruar nga Damasku me koalicionin ndërkombëtar konfirmon rolin e Sirisë në “luftimin e terrorizmit dhe mbështetjen e stabilitetit rajonal”.

“Marrëveshja është politike dhe deri më tani nuk përmban komponentë ushtarakë”, shkroi ai në një postim në X.

Marrëveshja e bën Sirinë vendin e 90-të që i bashkohet koalicionit, i cili synon të parandalojë luftëtarët e huaj që t’u bashkohen radhëve të ISIS-it dhe të eliminojë personat e mbetur të grupit nga e gjithë Lindja e Mesme.

Ndërkohë, një zëdhënës i Ministrisë së Brendshme të Sirisë njoftoi  të shtunën, ndërsa al-Sharaa do të mbërrinte në SHBA për takimin e tij me Trump, se ishin kryer operacione parandaluese në të gjithë vendin që synonin veprimet e ISIS-it.

Sipas raportimeve, forcat siriane të sigurisë kryen 61 bastisje, ku u arrestuan 71 persona dhe u sekuestruan eksplozivë dhe armë.

Sakaq, të hënën Siria kishte penguar dy komplote të ISIS-it për të vrarë al-Sharaa-n.

Zyrtari i lartë i sigurisë siriane dhe zyrtari i lartë i Lindjes së Mesme thanë se komplotet për vrasje u parandaluan gjatë muajve të fundit.

Ata pohuan se skemat nënvizojnë kërcënimin e drejtpërdrejtë me të cilin përballet al-Sharaa, ndërsa përpiqet të konsolidojë pushtetin në një vend të fragmentuar që është shkatërruar nga 14 vjet luftë civile.

Udhëheqësi sirian u lavdërua nga Trump gjatë takimit të tyre në Shtëpinë e Bardhë, ndërsa ai siguroi një pezullim gjashtëmujor të sanksioneve të SHBA-së kundër vendit të tij.

Presidenti 43-vjeçar rrëzoi nga pushteti ish-presidentin sirian Bashar al-Assad në dhjetor në një ofensivë të armatosur.

Ai më parë drejtonte Hayat Tahrir al-Sham, një grup i armatosur që ishte i lidhur me al-Kaedën. Ai u hoq nga lista e “terroristëve” të Uashingtonit javën e kaluar, duke anuluar një shpërblim prej 10 milionë dollarësh për kapjen e tij.