Një rast i “vrasjes në tentativë” ka ndodhur mbrëmjen e së dielës në magjistralen Prishtinë–Ferizaj.

Sipas Policisë, ngjarja ka ndodhur rreth orës 22:25, ku një burrë ka njoftuar se derisa ishte duke lëvizur me veturën e tij, një person i panjohur nga një veturë tjetër në lëvizje ka shtënë me armë në drejtim të tij.

Si pasojë e të shtënave, është goditur vetëm pjesa e pasme e veturës, ndërsa viktima nuk raportohet të ketë pësuar lëndime.

Në vendin e ngjarjes kanë dalë njësitë relevante policore, të cilat kanë gjetur dhe sekuestruar dy gëzhoja.

Me vendim të prokurorit, rasti është iniciuar si “vrasje në tentativë” dhe po vazhdon të hetohet.