Është hapur edicioni i gjashtë i konferencës “Konferenca Ndërkombëtare e Kosovës për Kërkime Arsimore”, edicion në të cilin do të trajtohen tema për përgatitjen e mësimdhënësve, për cilësinë e mësimdhënies, reforma kurrikulare, edukimin në fëmijërinë e hershme, gjithëpërfshirjen, zhvillimin profesional, udhëheqjen shkollore, vlerësimin, teknologjinë dhe inteligjencën artificiale në arsim, raporton Ekonomia Online.

Ministri në detyrë i Arsimit dhe Shkencës, Hajrullah Çeku tha se kjo konferencë duhet të nxisë diskutimin për të ndarë përvoja të mira për ta projektuar të ardhmen e shkollave dhe të universiteteve në vend.

 “Kjo konferencë duhet të na nxisë diskutimin për të ndarë përvojat e mira, për të marrë mësime, për të analizuar sfidat dhe arritjet tona, e veçanërisht, për ta projektuar të ardhmen e shkollave dhe të universiteteve tona. Kjo konferencë, e cila organizohet nga Fakulteti i Edukimit, pikërisht nga aty ku nisin ndryshimet, aty ku formohen dhe përgatiten mësimdhënësit e brezave të rinj. Kjo platformë duhet të kontribuojë në bashkërendimin e politikave tona shtetërore. Temat që do të trajtoni këto dy ditë janë pikërisht mbi të cilat po vijon reforma në arsim. Çdo sistem arsimor vlen aq sa vlen investimi i mësimdhënësve që e përbëjnë atë”, u shpreh ai.

Kurse, rektori i Universitetit të Prishtinës, Arben Hajrullahu, foli për numrin në rënie të studentëve dhe tha se duhet reformuar sistemi arsimor për të pasur një të ardhme më të qëndrueshme.

“Ne jemi dëshmitarë që zhvillimet demografike po tregojnë që edhe numri i nxënësve, por edhe i studentëve është duke rënë. Largimi i njerëzve, jo vetëm nga Kosova, por nga tërë kjo pjesë e Evropës, është real. E në qoftë se duam të kemi një të ardhme të qëndrueshme, ne duhet, mund të punojmë fort që vërtet me shkuar vërtet vetëm në aspektin deklarativ që jemi duke punuar, duke reformuar sistemin e arsimit, edhe këtu me edukuar shoqëritë e dijes. Në qoftë se arrijmë ne, edhe mundësitë i kemi besoj fort të mira që me krijuar një shoqëri të dijes, atëherë ne e krijojmë bazën edhe për me i mbajtur njerëzit këtu, edhe për me krijuar një fundament solid për zhvillim të qëndrueshëm. E në qoftë se dështojmë këtu, atëherë edhe besoj që kemi me dështuar si shoqëri, si universitet, edhe gjithë si shoqëri. Duke parë zhvillimet e viteve, dekadave të fundit, me gjithë sfidat që ekzistojnë, unë besoj që trendi është pozitiv. Ne jemi duke tentuar me u përshtatur bazuar në zhvillimet teknologjike, punë me të cilën jetojmë”, tha Hajrullahu.

Ndërsa, dekani i Fakultetit të Edukimit, Blerim Saqipi  theksoi se po krijohet përshtypja se në disa profile ka më shumë mësimdhënës sesa është kërkesa, ndërsa në anën tjetër po shkohet gradualisht drejt mungesës së kuadrove të kualifikuara në disa profile të tjera.

“Brenda pak vitesh, ne kemi kaluar nga mësimdhënia tradicionale e natyrës shkumës dhe tabelë, tek nevoja për përdorim aktiv të teknologjisë digjitale. E sot po përballemi me sfidat dhe mundësitë e inteligjencës artificiale. Asnjë profesion tjetër nuk ka për detyrë të përgatisë brezat e rinj për një botë që po ndryshon kaq shpejt. Ndërsa në anën tjetër, ndryshimet, si reforma kurrikulare dhe licencimi i mësimdhënësve, po perceptohen më shumë si kërkesa shtesë e kontrollit sesa mbështetje profesionale. Paralelisht, ndryshimet demografike dhe rënia e numrit të nxënësve po krijojnë një paradoks interesant. Nga njëra anë, krijohet përshtypja se në disa profile kemi më shumë mësimdhënës sesa është kërkesa, ndërsa në anën tjetër po shkojmë gradualisht drejt mungesës së kuadrove të kualifikuara në disa profile të tjera. Kjo tek interesimi i të rinjve për studime në fushën e edukimit është përgjysmuar në 5 vitet e fundit. E, Kosova vazhdon të ketë pesë fakultete të edukimit, numër ky që e kalon vendet e rajonit në proporcion me popullatën”, tha ai.

Konferenca, do zgjasë dy ditë, ndërsa gjatë këtyre ditëve do të ketë mbi 120 prezantime shkencore të organizuara në 22 sesione paralele në sallat e Fakultetit të Edukimit.