Ramush Haradinaj dikur ishte bërë pothuajse truproje e Albin Kurtit dhe Dardan Molliqajt. Sa ishin në opozitë, kryetari i AAK-së përkrahte secilin veprim të Vetëvendosjes. Madje, edhe kur përdornin armë në Kuvendin e Kosovës.

Por, tash, kur AAK është në pozitë e VV në opozitë, kanë nisur të rikthehen akuzat e vjetra.

Partia e Albin Kurtit po e cilëson Ramush Haradinajn si tradhtar pse ky i fundit arriti marrëveshje me LDK-në që ta votojnë demarkacionin, të mërkurën.

Kësaj akuze nuk kanë dashur t’i përgjigjen zyrtarët e AAK-së.

Halil Matoshi, anëtar i AAK-së dhe këshilltar i Ramush Haradinajt, ka dhënë vlerësim të madh për shefin e tij kur është pyetur për akuzën e VV-së. Ka thënë vetëm se kryeministri është luftëtar i paepur.

Pavarësisht se është arritur marrëveshja për demarkacionin, ende nuk janë siguruar të gjitha votat. Duhen edhe disa vota të deputetëve të Vetëvendosjes ose edhe të Listës Sprska.