Abbott: S’duhet të harrohet e kaluara, por Kosova e Serbia duhet të bëjnë kompromise

Prishtinë | 17 Jan 2023 | 13:11 | Nga Artiona Çitaku Shkarko Videon HD

Për ta shkarkuar videon ju lutem kyçuni ose regjistroni një llogari të re!

| Regjistrohu

Ambasadori britanik, Nicholas Abbott, të martën ka zhvilluar një bashkëbisedim me studentët e Fakultetit Filozofik, raporton Ekonomia Online.

Atyre Abbott u ka thënë se nuk duhet që të harrohet e kaluara, por që Kosova e Serbia duhet të bëjnë kompromise.

Ai më tej, shtoi se asnjë shtet në Ballkan nuk duhet ta vë në dyshim të ardhmen evropiane, ndonëse tha se shteti i tij nuk është më pjesë e BE-së. Abbott theksoi problematikën e migrimit dhe tha se në këtë fazë prioritet mbetet lufta në Ukrainë.

“As Kosova dhe as Serbia nuk përfitojnë nga status quo-ja, vetëm Rusia është e kënaqur nëse të dyja vendet nuk bëjnë progres, kështu që kontributi më i fuqishëm që Kosova mund të japë për sigurinë evropiane tani është të bëjë përparim në një marrëveshje me Serbinë, një marrëveshje që normalizon marrëdhëniet dhe siguron pavarësinë e Kosovës dhe integrimin e saj kombëtar”.

“E di që nuk do të jetë e lehtë. Kjo gjë kërkon kurajë, vendosmëri dhe unitet nga liderët e Kosovës dhe mbështetje dhe mirëkuptim nga populli i saj. Do të ketë nevojë për besim në të ardhmen, për të demonstruar përkushtim dhe për të gjetur forcë në parimet që janë të përcaktuara në Kushtetutën e Kosovës. Kjo nuk do të thotë se Kosova dhe Serbia do të lënë anash të gjitha dallimet mes tyre, as të harrojnë të kaluarën, por do të kërkojë kompromis dhe mbi të gjitha prioritizimin e mirëqenies afatgjatë të qytetarëve”.

“Jam shumë krenar qe Mbretëritë Bashkuara janë në çdo hap me Kosovën. Nuk duhet harruar e kaluara mes Kosovës dhe Serbisë, por duhet bërë kompromis. Sot nuk kemi asnjë prioritet më të madhe se sa ta përkrahim Ukrainën deri në çlirimin e saj. Që nga vera e kaluar ne kemi parë shumë, por shumë shqiptarë duke shkuar në Mbretëritë e Bashkuara, e që kjo përben një problematikë në vete”.

Abbott përmendi edhe sulmet e NATO-s kundër Serbisë në vitin 1999 duke theksuar se është bërë me qëllimin për ta ndalur një katastrofë.

“Në vitin 1999 NATO ndërhyri në Kosovë për të parandaluar një fatkeqësi humanitare”.

Ai tha po ashtu se është mirënjohës për ndihmën që Kosova ia ka bërë Ukrainës, duke iu ofruar strehim gazetarëve e refugjatëve.

“Jam shumë mirënjohës për ndihmën që Kosova i ka ofruar Ukrainës qoftë duke iu dhënë strehim refugjatëve dhe gazetarëve apo mbështetjen psikologjike për të mbijetuarit e dhunës seksuale”, tha Abbott.

Studentët e këtij fakulteti ishin shumë të interesuar rreth luftës Ukrainë-Rusi, meqë disa prej pyetjeve të tyre ishin rreth kësaj çështje.

Dashamir Berxulli, dekan i Fakultetit Filozofik, e falënderoi ambasadorin që ka pranuar ftesën që të bashkëbisedoi me studentët.

“Është kënaqësi të kemi një debat të hapur publik. Sigurisht që kemi edhe iniciativa të tjera në Fakultetin Filozofik dhe jemi krenar për punën që e bëjmë të gjithë, i’u falënderoj shumë për kohën”.

Ismet Krasniqi, kryetar i Këshillit të studentëve, tha se biseda me ambasadori u ka dhënë mundësi që të kuptojnë më shumë për politikën e Britanisë karshi Kosovës.

Ai e ka falënderuar Abbottin që nuk e ka refuzuar kërkesën e tyre, duke shtuar se Kosova duhet të marrë nga përvojat e këtij shtetit të fuqishëm.

Lexo më shumë:

Të ngjashme