Ministri i Punës dhe Mirëqenies Sociale, Arban Abrashi, ka bërë të ditur se këtë javë kanë filluar projektin që parasheh që 500 punëkërkues, shfrytëzues të asistencës sociale, të angazhohen në punësim përmes programit të subvencionimit të pagave, në periudhë subvencionimi 12 mujor (me mundësi vazhdimi).

Përmes një postimi në rrjetin social Facebook, Abrashi ka treguar se do të subvencionojnë punësimin me rreth 120-130 euro, për çdo përfitues të asistencës sociale, nëse pranon një kontratë punë një vjeçare (me mundësi vazhdimi), dhe heq dorë nga asistenca sociale.

Postimi i plotë i Abrashit:

“Këtë javë filluam projektin që parasheh që 500 punëkërkues, shfrytëzues të asistencës sociale, të angazhohen në punësim përmes programit të subvencionimit të pagave, në periudhë subvencionimi 12 mujor (me mundësi vazhdimi).

Me fjalë tjera, ne do të subvencionojmë punësimin me rreth 120-130 euro, për cdo përfitues të asistencës sociale, nëse pranon një kontratë punë një vjecare (me mundësi vazhdimi), dhe heq dorë nga asistenca sociale. Nëse edhe biznesi i ofron të njëjtën shumë, atëherë po flasim për të hyra solide prej 250-300 euro për një punëmarrës.

Pra idea është që fondet pasive t’i kthejmë në fonde aktive, në bashkëpunim me komunitetin e biznesit, në mënyrë që të ulim inaktivitetin dhe të zvoglojmë papunësisë.

Do ta fillojmë me 500 përfitues, dhe varësisht nga suksesi e rrisim edhe numrin. Paraprakisht, sipas kërkesave të komunitetit të biznesit këta do të përfshihen në trajnim intenziv.

Ftoj gjitha bizneset e interesuara të vizitojnë zyret e punësimit për informata shtesë”, ka shkruar Abrashi.