Përballë të gjithë atyre kritikave për reagimin polemizues dhe sfidën e hapur ndaj tifozëve të Juventusit, Jose Mourinho mori një mbështetje për fundin kontrovers të sfidës së Torinos, ku Manchester United mundi kampionët e Italisë.

Carlo Ancelotti doli në mbrojtje të kolegut të tij portugez, duke e cilësuar një reagim të logjikshëm në fundin e një ndeshjeje me ofendime pafund ndaj “Special One”.

“Më falni, nuk e dëgjova”, tha me shaka trajneri i Napolit, duke përsëritur gjestin e Mourinhos në “Allianz Stadium”, ndërsa më pas shpjegoi edhe pse ishte në krah të luzitanit, shkruan Top Channel

“Përtej shakave, duhet të them që veprimi i Mourinhos ishte krejtësisht i justifikueshëm, pasi nuk bëri asgjë vulgare apo ofensive ndaj tifozëve. Ai u ofendua në mënyrë të përsëritur. Në stadiume duhet të përkrahësh skuadrën tënde dhe jo të fyesh kundërshtarin”, tha Ancelotti.

Objektivi i teknikut dhe i skuadrës së tij, Napoli, do të jetë suksesi të shtunën kundër Genoas, për t’i dhënë vazhdimësinë një momenti të rëndësishëm në sezon.