Massimiliano Allegri e kishte këshilluar patronin e Juventusit, Andrea Agnelli, ta hiqte qafe Cristiano Ronaldon, i cili, sipas tij, po e pengonte rritjen ekipit.

Gazeta italiane La Repubblica shkroi të martën se Allegri e kishte këshilluar presidentin e Juventus ta largonte Ronaldon para se ai të shkarkohej nga posti i trajnerit të bardhezinjve.

“Hiqe qafe Ronaldon, ai po e pengon rritjen e ekipit dhe të klubit”, i kishte thënë ish-trajneri presidentit të klubit, sipas të përditshmes italiane.

Juventusi i ka fituar nëntë në nëntë vjetët e fundit në Serie A, por e solli Ronaldon në klub me qëllim për ta arritur lavdinë në Evropë, por ka dështuar keq në tri tentime me të, duke u eliminuar herët nga Liga e Kampionëve.

Gazeta italiane shkruan se skenari ka ndryshuar nga “marrëveshja e shekullit” për Juventusin në “Juventusi i burgosuri i yllit të vet”.

Marrëveshja e Ronaldos me Juven mbaron më 2022 dhe raportohet se portugezi do të takohet me drejtuesit e klubit për ta diskutuar të ardhmen në fund të sezonit.

Juventusi është i gatshëm t’i japë lamtumirën Ronaldos, por do ta ketë të vështirë për dy arsye.

Së pari, nuk ka asnjë ofertë konkrete për portugezin dhe ekziston një problem me taksat. Nëse Ronaldo largohet nga Torino, ai do të detyrohet të heqë dorë nga përfitimet fiskale që ia ofron vetëm Italia.