Komisioni për Mbikëqyrjen e Financave Publike ka shqyrtuar, të martën, Raportin e Auditimit të Performancës sa i përket renovimeve dhe rikonfigurimit të Stadiumeve të Qytetit në Mitrovicë, Gjilan dhe Gjakovë.

Derisa ministri i Kulturës, Rinisë dhe Sportit, Hajrulla Çeku, ka folur për “seriozitet më të madh në histori” për ta pajisur Kosovën me infrastrukturë sportive, deputetja e AAK-së, Albana Bytyqi, kishte një pyetje konkrete.

“A muj me ditë ministër, sa stadiume i ke nisur dhe përfunduar. Je në përfundim të mandatit”, tha Bytyqi, raporton Ekonomia Online.

Çeku i cili e ka marrë këtë detyrë para tri vitesh, ka fajësuar qeverisjet e kaluara pse MKRS nuk ka arritur ta kompletojë asnjë stadium. Ai ka veçuar stadiumin “Adem Jashari” në Mitrovicë, i cili aktualisht është në gjendje të mjerueshme.

“Me pasë nisë qysh duhet në 2019, ‘Adem Jashari’ në Mitrovicë ish dashtë për dy vjet me u kry. Është nisë pa u përmbushë kushtet elementare, shpronësim, leje, kushte ndërtimore. Është absurde me nisë procedurën, e lëre me lidh kontratë pa u krye këto punë”, ka vazhduar Çeku.

“Çka me ba tash, mua më ka ra hise me i krye këto punë, që ata u dasht me i krye. Na ka marrë kohë dy vjet”, është arsyetuar ai.

Por, Çeku ka lëvduar veten se asnjëherë në historinë e Kosovës nuk ka pasur “seriozitet” më të madh për ta pajisur Kosovën me infrastrukturë sportive.

“Kjo çështje është më komplekse sesa me pyet sa i ke nisë, edhe sa i ke përfunduar”, i është përgjigjur kreu i MKRS-së, deputetes opozitare.

“Por, ti nuk do të jesh në mandatin e ardhshëm”, ka replikuar Bytyqi.

E Çeku tha se me rëndësi punët po vihen në vijë dhe SE ministri i ardhshëm nuk do t’i ketë problemet që ka pasur ai.

LEXO EDHE:

Auditori gjen parregullsi në projektet e tri stadiumeve, Çeku: Kemi marrë masat e duhura