Gazeta britanike “Daily Mail” shkruan se zola anti-tank dhe pushkët automatike AK-47 do të shkonin për bandat meksikane në kufi me ShBA-në.

Policia e Kosovës në bashkëpunim me DEA-në amerikane ka arrestuar dhjetë persona, katër prej tyre në Kosovë dhe gjashtë në Nju Jork, si dhe ka konfiskuar armë dhe prova të tjera materiale.

Një person nga Staten Island i New Yorkut është akuzuar për shitje të raketave anti-tank dhe 15 pushkëve automatike AK-47 në Kosovë, për të cilat ai beson se do të shkonin për bandat meksikane në kufirin me ShBA-të, shkruan gazeta.

Albert Veliu është në mesin e tetë të akuzuarve për shpëlarje parash, trafikim ndërkombëtar të armëve dhe zhvatje.

Ai u është referuar pushkëve automatike si ‘sneakers’, ndërsa lansuesin Zola M80 Anti-Tank e ka quajtur si “Shaq-sized sneaker”, duke iu referuar basketbollistit të njohur Shaquille O’Neal, kanë thënë autoritetet.

Bashkëpunëtorët e tij janë arrestuar nën dyshimet se janë ndërlidhur me një skemë shpëlarjeje. Albert Veliu ishte kapur derisa po tentonte të shiste armët tek një agjent i mbuluar.

Sipas gazetës, armët ishin aranzhuar për t’u shitur për një kartel të drogës nga Meksika, që ishte në luftë me rivalët e tij në afërsi të kufirit me ShBA-në.

Gazeta ka publikuar fotografitë e Albert Veliut dhe njërit nga bashkëpunëtorët e tij Anthony Noterile.