Me një fletë në duar, para dyerve të Kuvendit të Kosovës në Prishtinë, aktivistja Blendë Asllani dëshironte ta dërgonte një mesazh të qartë.

“Deputetët dhe deputetet s’kanë mandat t’i cenojnë trupat tanë”, ishte thirrja që ajo bëri në fjalimin e saj.

Kjo thirrje ishte slogani i protestës së organizuar nga aktivistët e Kolektivit MARShojmë S’Festojmë më 29 shkurt, e nxitur nga debati për rregullimin e shëndetit riprodhues në Kosovë.

Aty mori pjesë edhe Blenda, si pjesë e organizatës Qika, dhe lexoi deklaratën e përbashkët.

Komentet që mori në rrjete sociale më vonë, ia konfirmuan një besim që thotë se e kishte krijuar qysh si studente e shkencave politike në Universitetin e Prishtinës, disa vite më parë.

“Gjuha ishte tejet denigruese ndaj grave. Natyrisht ndaj meje pasi që e lexova deklaratën, por edhe ndaj të gjitha grave. Edhe deputetët, për shkak të botëkuptimeve të tyre kryesisht fetare dhe nacionaliste, ia mohojnë dikujt ta shijojë prindërimin si mundësi që shkenca ia ka dhënë”, thotë ajo për Radion Evropa e Lirë.

Debati se kush dhe si duhet të lejohet të mbetet shtatzënë ka vënë në dyluftim dy taborë: ata që mendojnë se një grua duhet të lejohet të bëjë çfarë të dojë me trupin e saj dhe ata që thonë se vetëm gruaja që ka partner, duhet të lejohet t’i përdorë metodat e fertilizimit të asistuar, të njohur si IVF.

I gjithë ky debat ka nisur nga projektligji për shëndetin riprodhues, i cili është diskutuar disa herë në Kuvendin e Kosovës që nga marsi i vitit të kaluar.

Në këtë projektligj parashihet që gratë të kenë qasje në IVF pa marrë parasysh statusin e tyre: qofshin beqare, qofshin në një çift homoseksual apo heteroseksual.