Kosova do të jetë nikoqire e Asamblesë Vjeshtore të Përgjithshme të studentëve përfaqësues të mjekësisë nga Evropa, e cila do të zhvillohet nga data 9 deri më 15 shtator 2016 në Prishtinë, një bashkorganizim i “EMSA-Autumn Assembly” dhe Fakultetit të Mjekësisë të Universitetit të Prishtinës “Hasan Prishtina”.

Kjo ngjarje e nivelit ndërkombëtar organizohet për herë të parë në Kosovë dhe në Ballkan. Asambleja do të grumbullojë të gjitha shtetet përfaqësuese të Bashkimit Evropian në vendin tonë, i cili synon të bëhet pjesë e BE-së. Numri i pjesëmarrësve në këtë asamble do të jetë rreth 270 persona duke e pasur parasysh që kjo është asambleja e përgjithshme e EMSA-Europe.

Në agjendën e kësaj asambleje do të përfshihen aktivitete edukative, shkencore, shoqërore, profesionale dhe seancat plenare ku do të marrin pjesë të gjithë përfaqësuesit evropianë me të drejtë vote.

Kjo ngjarje është e nivelit ndërkombëtar dhe ka një rëndësi të veçantë sepse organizohet përherë të parë në Kosovë dhe në Ballkan.

Nga realizimi i këtij projekti do të përfitojë Kosova, Fakulteti i Mjekësisë dhe Universiteti i Prishtinës “Hasan Prishtina”, studentët e mjekësisë në Kosovë dhe Evropë.

Organizimi i një ngjarje të tillë ndërkombëtare do të mundësojë forcimin e pozitës së shtetit dhe studentëve në sferën ndërkombëtare; promovimin dhe ndryshimin e përshtypjes ndërkombëtare për Kosovën, si dhe për të rinjtë e saj, gjë e cila do të reflektonte pozitivisht në integrimin e Kosovës në BE; zënien e hapit me zhvillimet ndërkombëtare të edukimit dhe shëndetësisë; ngritjen e nivelit të arsimit në vendin tonë; njoftimin e studentëve tonë me modelet ndërkombëtare të edukimit dhe shëndetësisë; promovimin e  resurseve tona natyrore dhe trashëgimisë kulturore; krijimin e kontakteve me studentë përfaqësues ndërkombëtar dhe profesionistë tjerë mjekësor; bashkëpunimin ndërprofesional dhe ndërkombëtar; krijimin e mundësive të reja për edukim jashtë vendit, e të tjera.