Tre persona kanë humbur jetën në Francë për shkak të problemeve shëndetësore të shkaktuara nga vala ekstreme e të nxehtit, ndërsa rreth 2,700 shkolla janë planifikuar të mbyllen ose të ndryshojnë orarin mësimor, teksa autoritetet në mbarë Evropën kanë lëshuar paralajmërime për të hënën.

Temperaturat në Bordeaux, në jugperëndim të Francës, janë parashikuar të tejkalojnë 42 gradë Celsius (107.6 Fahrenheit) të hënën.

Agjencia meteorologjike “Météo France” ka bërë të ditur se 49 rajone administrative do të jenë nën alarm të kuq për valë të nxehti, shkruan Reuters.

“Po përballemi me, të paktën, disa ditë mot shumë, shumë të nxehtë. Nuk e dimë kur temperaturat do të fillojnë të bien,” ka deklaruar ministrja franceze e Shëndetësisë, Stéphanie Rist, për televizionin TF1.

Ndërkohë, sipas zyrtares lokale Sophie Brocas, tre persona të moshuar, të moshës 80 deri në 95 vjeç, kanë vdekur gjatë fundjavës në rajonin e Bordeaux-it si pasojë e problemeve shëndetësore të lidhura me valën aktuale të të nxehtit në Francë.