Ylli i Manchester Cityt, Phil Foden, është shfaqur si një objektiv surprizë i Galatasarayt për merkaton e verës, sipas raportimeve të fundit nga mediat turke.

Mesfushori anglez, i cili nuk u përfshi në skuadrën e Anglisë për Kupën e Botës, ka kaluar të gjithë karrierën te Manchester City, pasi u formua në akademinë e klubit.

Foden debutoi me ekipin e parë në moshën 17-vjeçare dhe që atëherë ka zhvilluar 369 ndeshje, duke shënuar 110 gola dhe fituar çdo trofe të mundshëm me klubin e tij të fëmijërisë.

Galatasaray e kërkon si numrin e ri 10

Pas një sezoni të vështirë 2025/26, e ardhmja e 26-vjeçarit është vënë në dyshim. Manchester City do ta nisë një epokë të re nën drejtimin e Enzo Marescas, i cili ka zëvendësuar Pep Guardiolën në postin e trajnerit.

Kontrata aktuale e Foden me klubin nga “Etihad” hyn në vitin e fundit dhe, sipas gazetës turke “Fanatik”, Galatasaray po përgatitet të shqyrtojë mundësinë e transferimit të tij.

Kampionët turq e shohin Foden si kandidatin ideal për ta marrë fanellën me numrin 10 dhe për t’u bërë figura kryesore e repartit ofensiv.

Raportohet se edhe disa klube të tjera evropiane po e monitorojnë situatën e mesfushorit, vlera e të cilit në treg llogaritet rreth 70 milionë euro.

Foden mund të largohet për më shumë minuta

Megjithëse Foden është i lidhur ngushtë me Manchester Cityn dhe në të kaluarën ka shprehur dëshirën për ta kaluar të gjithë karrierën në një klub, raportimet pretendojnë se ai mund ta shqyrtojë largimin për shkak të minutave të kufizuara gjatë sezonit të kaluar.

Galatasaray po përpiqet seriozisht ta realizojë transferimin dhe dëshiron ta ribashkojë anglezin me ish-bashkëlojtarët e tij te City, Leroy Sane dhe Ilkay Gundogan.

Agjentit George Gardi, i njohur për lidhjet e afërta me klubin turk, raportohet se i është dhënë autorizim i plotë për të punuar në këtë operacion. Ai besohet se ishte personi që propozoi emrin e Foden si objektivin kryesor.

Edhe Bruno Fernandes në listën e dëshirave

Kërkimi i Galatasarayt për një organizator të ri të lojës nuk përfundon vetëm te Foden.

Klubi turk po monitoron gjithashtu situatën e kapitenit të Manchester United, Bruno Fernandes, megjithëse një transferim i tillë do të ishte po aq ambicioz dhe i vështirë për t’u realizuar.

Në listën e alternativave ndodhen edhe Can Uzun i Eintracht Frankfurtit dhe reprezentuesi paraguajan Julio Enciso, i cili luan për Strasbourgun në Ligue 1.

Marrëveshje paraprake për kontratë të re me Cityn

Pavarësisht spekulimeve për një transferim në Turqi, raportime të shumta gjatë muajit maj pretendonin se Foden kishte arritur një marrëveshje në parim për vazhdimin e kontratës me Manchester Cityn.

Sipas BBC-së dhe mediave të tjera britanike, palët kishin rënë dakord për një kontratë të re katërvjeçare, me mundësi vazhdimi edhe për një sezon tjetër.

Megjithatë, klubi ende nuk ka bërë ndonjë njoftim zyrtar.

Foden aktualisht po shijon pushimet pas përfundimit të sezonit dhe është parë në Wimbledon dhe në garën e Formula 1 në Silverstone, pasi nuk u përzgjodh nga Thomas Tuchel për Kupën e Botës.

Pritet të rikthehet në stërvitje më 20 korrik

Mesfushori pritet t’i bashkohet përgatitjeve parasezonale të Manchester Cityt më 20 korrik, përpara turneut aziatik të klubit.

Skuadra do të zhvillojë ndeshje miqësore kundër Interit, yjeve të kampionatit të Koresë së Jugut dhe Atletico Madridit në Hong Kong dhe Korenë e Jugut.

Më pas, City do të përballet me Arsenalin në “Community Shield” më 16 gusht, ndërsa sezonin e ri të Premierligës do ta nisë më 23 gusht me ndeshjen në transfertë ndaj Bournemouthit.