Ushtruesja e detyrës së presidentes së vendit Albulena Haxhiu, ka shprehur ngushëllime për ndarjen nga jeta të ish-deputetes dhe humanistes Flora Brovina, duke vlerësuar lart kontributin e saj për Kosovën dhe të drejtat e njeriut.

Haxhiu e përshkroi Brovinën si një grua që “ia kushtoi gjithë jetën njerëzve dhe vendit të vet”, duke theksuar angazhimin e saj si mjeke, humaniste dhe veprimtare gjatë viteve më të vështira të Kosovës.

“Organizoi, ndihmoi, protestoi dhe ngriti zërin kundër dhunës e represionit, duke e kthyer angazhimin publik në një formë të përditshme të qëndresës. Edhe kur kjo e vuri drejtpërdrejt përballë regjimit serb, nuk u tërhoq”, ka shkruar Haxhiu.

Ajo ka kujtuar edhe arrestimin e Brovinës në pranverën e vitit 1999 dhe burgosjen e saj në Serbi, ku ishte dënuar me 12 vjet burg. Sipas Haxhiut, për lirimin e saj ishin angazhuar organizata ndërkombëtare për të drejtat e njeriut, shkrimtarë dhe institucione nga vende të ndryshme të botës.

Në mesazhin e saj, Haxhiu e ka cilësuar Brovinën edhe si të burgosur politike, veterane të luftës së UÇK-së dhe pjesë të brezit që sakrifikoi për lirinë e Kosovës.

Haxhiu, ka veçuar edhe kontributin e saj në letërsinë shqipe, duke theksuar se në poezinë e Brovinës u trajtuan tema si gruaja, fëmija, dhimbja, lindja, humbja dhe liria.

Pas luftës, Brovina vazhdoi angazhimin institucional, duke shërbyer për vite si deputete e Kuvendit të Kosovës dhe duke qenë një nga nënshkrueset e Deklaratës së Pavarësisë.

Në fund, Haxhiu u ka shprehur ngushëllime familjes Brovina dhe Begu, miqve, bashkëpunëtorëve dhe të gjithë atyre që e njohën Flora Brovinën.

“I përjetshëm qoftë kujtimi për Flora Brovinën”, përfundon mesazhi i presidentes në detyrë.

Postimi i plotë:

Kosova sot humbi Flora Brovinën, gruan që ia kushtoi gjithë jetën njerëzve dhe vendit të vet.

Mjeke, humaniste dhe veprimtare për të drejtat e njeriut, ajo u gjend pranë fëmijëve dhe familjeve në vitet më të vështira për Kosovën. Organizoi, ndihmoi, protestoi dhe ngriti zërin kundër dhunës e represionit, duke e kthyer angazhimin publik në një formë të përditshme të qëndresës. Edhe kur kjo e vuri drejtpërdrejt përballë regjimit serb, nuk u tërhoq.

Në pranverën e vitit 1999 u arrestua dhe u dërgua në burgjet e Serbisë, ku u dënua me 12 vjet burg. As aty nuk hoqi dorë nga bindjet e veta. Për lirimin e Flora Brovinës u angazhuan organizata ndërkombëtare për të drejtat e njeriut, shkrimtarë dhe institucione nga vende të ndryshme të botës. Ishte e burgosur politike, veterane e luftës së UÇK-së dhe pjesë e brezit që sakrifikoi aq shumë për lirinë e Kosovës.

Flora Brovina ishte zë i veçantë edhe në letërsinë shqipe. Në vargjet që shkroi, gruaja, fëmija, dhimbja, lindja, humbja dhe liria morën formën e përvojave të jetuara. Poezia e saj kishte butësinë e mjekes, ndjeshmërinë e gruas dhe qëndresën e njeriut që kishte kaluar nëpër sfida të rënda.

Pas luftës vazhdoi angazhimin në jetën institucionale të vendit. Për vite me radhë ishte deputete e Kuvendit të Kosovës dhe nënshkruese e Deklaratës së Pavarësisë.

Ngushëllimet më të sinqerta familjes Brovina dhe Begu, miqve, bashkëpunëtorëve dhe të gjithë atyre që e njohën dhe e çmuan.

I përjetshëm qoftë kujtimi për Flora Brovinën.