Gjashtë federata arabe të futbollit e kanë vazhduar mbështetjen e tyre për presidentin e FIFA-s, Gianni Infantino, në një lëvizje që vjen në një kohë kur kriza brenda qeverisë së futbollit botëror po përshkallëzohet.

Një projekt investimi privat ka shkaktuar kundërshtime të gjera, me tre kontinente që e kanë kritikuar mënyrën se si presidenti zviceran i drejton çështjet dhe e kanë kërkuar largimin e tij.

Drejtuesit e federatave të Katarit, Marokut, Egjiptit, Libanit, Sudanit dhe Mauritanisë e shpallën të enjten mbështetjen e tyre të plotë.

Infantino po përgatitet të kandidojë në zgjedhjet presidenciale të FIFA-s, të planifikuara për marsin e ardhshëm, ndërsa gjashtë federatat e konfirmuan besimin e tyre në drejtimin e tij dhe angazhimin e tij për zhvillimin e futbollit në nivel global.

“Futbolli arab luan një rol të rëndësishëm në bashkimin e popujve dhe forcimin e bashkëpunimit mes federatave të rajonit”, deklaruan gjashtë federatat në një deklaratë të përbashkët të publikuar nga Reuters, përcjell “Gazeta Express”.

Ato e konfirmuan mbështetjen e tyre të plotë për Infantinon dhe vazhdimin e besimit të tyre në drejtimin e tij dhe në angazhimin e tij të vazhdueshëm për zhvillimin e futbollit në mbarë botën.

Katër nga gjashtë nënshkruesit janë gjithashtu pjesë e Këshillit të FIFA-s: Hamad bin Khalifa Al Thani, Hani Abo Rida, Fouzi Lekjaa dhe Ahmed Yahya.

Kjo ia shton edhe më shumë rëndësi kësaj lëvizjeje.

Drejtuesit e federatave shtuan: “Ne i vlerësojmë shumë përpjekjet e vazhdueshme të Infantinos për zhvillimin e futbollit në nivel global, zgjerimin e mundësive për të gjitha rajonet dhe forcimin e rolit të futbollit në bashkimin e popujve dhe komuniteteve”.

Ata synojnë ta vazhdojnë bashkëpunimin me presidentin e FIFA-s për ta ndërtuar një “të ardhme më të fortë dhe më të begatë për futbollin botëror”, duke i zgjeruar mundësitë dhe duke e forcuar kontributin e futbollit arab në skenën ndërkombëtare.

Kjo mbështetje vjen në një kohë kur Infantino po përballet me një nga krizat më të mëdha të presidencës së tij.

UEFA, Konfederata Aziatike e Futbollit dhe CONCACAF kanë kundërshtuar publikisht një projekt investimi që e synonte ristrukturimin e të drejtave komerciale të disa kompeticioneve të FIFA-s.

Infantino kishte propozuar ndarjen e të drejtave komerciale të Kupës së Botës dhe shitjen e një pjese prej 20% investitorëve të sektorit privat.

Kjo lëvizje do t’i sillte rreth 4.2 miliardë dollarë, por ai u tërhoq pas një vale të gjerë kritikash.

Infantino do të ketë nevojë për 106 vota për një shumicë të thjeshtë nëse përballet vetëm me një rival.

Nëse do të ketë tre ose më shumë kandidatë, ai do të duhet ta sigurojë një shumicë prej dy të tretash në raundin e parë, pra 141 vota, për të fituar. /Gazeta Express