Kosova do të udhëheqë dy komisione gjatë kryesimit të Asamblesë Parlamentare të Procesit të Bashkëpunimit të Evropës Juglindore nga Turqia (2020-2021), përkatësisht Komisionin për Zhvillim Social, Arsim, Kërkim dhe Shkencë dhe Komisionin e Përgjithshëm për Ekonomi, Infrastrukturë dhe Energji. Ky vendim është marrë në përmbylljen e punimeve të Asamblesë Parlamentare të Procesit të Bashkëpunimit të Evropës Juglindore (SEECP), e cila këtë vit është kryesuar nga Kosova.

Gjatë kësaj asambleje është bërë e ditur se Kosova do të fillojë përgatitjet e aplikimit që Sekretariati i Përhershëm i Asamblesë Parlamentare të Procesit të Bashkëpunimit të Evropës Juglindore të vendoset në Prishtinë. Kjo do të nënkuptonte që Kosova për herë të parë të jetë selia e një organizate ndërkombëtare me influencë, shkruan KOHA Ditore.

Kryetarja e Kuvendit, Vjosa Osmani, që ka udhëhequr punimet online të sesionit plenar të SECP-së, ka thënë se Bashkimi Evropian nuk ka arritur të realizojë ende premtimin e vet për t’ia dhënë popullit të Kosovës liberalizimin e vizave. Ajo ka theksuar se BE-ja duhet të mbajë këtë premtim, pasi, siç ka thënë, 2 milionë kosovarë kanë mbetur larg nga pjesa tjetër e Evropës.

Ajo ka folur edhe për pandeminë, që, siç ka thënë, ka shkatërruar dinamikën ekonomike dhe ka ulur ashpër furnizimin. Për këtë ajo theksoi se objektivë e këtij sesioni plenar është përmirësimi i bashkëpunimit politik, ekonomik dhe i sigurisë.

“Objektivat tona këtu janë përmirësimi i bashkëpunimit politik dhe të sigurisë, bashkëpunimi ekonomik dhe zgjerimi i bashkëpunimit në fushat e dimensioneve njerëzore, demokracisë, drejtësisë dhe luftimin e veprimtarive të paligjshme. Ky takim vjen në një kohë shumë të paparë, dhe bashkëpunimi ynë tani është i nevojshëm më shumë se kurrë”, ka thënë ajo.

Sipas saj, bllokimi global që erdhi si rezultat i pandemisë po gjeneron sfida të pashembullta ekonomike që do të kenë një efekt të frikshëm në ekonomitë dhe në shoqëri.

“Pandemia ka ndaluar tregtitë globale dhe shkatërroi dinamikën ekonomike duke ulur ashpër furnizimin”, ka deklaruar Osmani.

Ajo ka thënë se sipas parashikimeve të FMN-së dy muaj më parë, ekonomia globale është parashikuar që të tkurret për 3 për qind këtë vit, një shifër shumë më e keqe se ajo gjatë krizës financiare e periudhës 2008-2009.