Prishtina zyrtare ka marrë mesazhin ndërkombëtar se nuk do t’ia dalë në mësymjen për t’u anëtarësuar sivjet në Organizatën Ndërkombëtare të Policisë (INTERPOL), por me këmbënguljen e kryeministrit në detyrë, Ramush Haradinaj, deri tash nuk e ka tërhequr aplikacionin që e ka deponuar qysh në janar.

Një nga zëvendësit e Haradinajt i ka thënë gazetës se kryeneçësia e kryeministrit në detyrë do t’i kushtojë Kosovës me “dështim spektakolar”.

INTERPOL-i ka pranuar që kërkesa e Kosovës të përfshihet në agjendën e Asamblesë së Përgjithshme të kësaj organizate, që në javën e ardhshme mbahet në Kili, shkruan Koha Ditore. Angola do të jetë vendi raportues, i cili është marrë me kërkesën e nisur nga Prishtina. Shteti i Kosovës nuk është njohur nga asnjëri prej këtyre dy vendeve.

Por ky përbën vetëm një prej barrierave që ka Kosova në rrugëtimin drejt anëtarësimit.

Një nga pesë zëvendëskryeministrat, i cili ka folur në kushte anonimiteti për Kohën Ditore, ka thënë se shkaku i kontekstit politik në të cilin ndodhet vendi, është thuajse e pamundur të korret ndonjë sukses në çfarëdo procesi anëtarësimi.