Kompania “Kelkos” tërheq paditë ndaj aktivistëve të mjedisit

Prishtinë | 20 Tet 2021 | 14:07 | Nga Fitore Berisha Shkarko Videon HD

Për ta shkarkuar videon ju lutem kyçuni ose regjistroni një llogari të re!

| Regjistrohu

Kompania “Kelkos Energy” ka vendosur që të heq dorë nga paditë ndaj aktivistëve të mjedisit, Shpresa Loshaj dhe Adriatik Gacaferi. Kjo kompani kishte ngritur padi me pretendimet se aktivistët kishin dëmtuar imazhin duke dhënë deklarata se “KelKos Energy” po dëmton hidrocentralet në Deçan, raporton Ekonomia Online.

“KelKos Energy” kishte kërkuar dëmshpërblim 100 mijë euro.

Avokatja Rina Kika përfaqësuese ligjore e aktivistëve tha se me datë 18 tetor është njoftuar zyrtarisht nga përfaqësuesit e “Kelkos Energy” për heqjen dorë nga paditë për shpifje ndaj aktivistëve.

“Avokatët e Kelkos më kanë përcjellë njoftimet zyrtare për heqje dorë nga të dy paditë të cilat iu janë përcjellur Gjykatës Themelore të Pejës – Dega Deçan. Ata kanë hequr dorë nga të dy paditë, pa asnjë kusht dhe menjëherë”, tha Kika.

Sipas saj, me heqjen dorë nga këto dy padi u dëshmua ajo që e kemi thënë gjatë tërë kohës, se Kelkos e ka ditur se nuk mund të fitojë me këto padi të pabaza në gjykatë dhe se qëllimi asnjëherë nuk ka qenë që ata ta fitojnë procesin, qëllimi ka qenë frikësimi i aktivistëve që i kritikojnë operimet e kësaj kompanie.

“Padi të tilla që tentojnë ta heshtin debatin publik për çështje të interesit publik siç është mbrojtja e ambientit janë të dëmshme dhe duhet të kundërshtohen fuqishëm nga të gjithë.” deklaroi ajo.

Ndërsa, aktivistaja Shpresa Loshaj,  tha se “KelKos Energy” ka ngritur padinë me qëllim për t’i frikësuar zërat kritikë siç i quan ajo.

“‘Kelkos’ mendoj që do të shterim energjinë duke u mbrojtur nga ata. Ne kemi mbështetjen nga gjithë Kosova. Kjo është fitore për gjithë Kosovën. Përkundër që ‘Kelkos’ ka vendosur të tërheqë këto padi unë dua të theksoj se asgjë nuk ka ndërruar në Grykën e Deçanit. ‘Kelkos’ po vazhdon të degradojë Grykën e Deçanit sepse po operojnë kundërligjshëm. Ne sot ishim për t’i verifikuar dhe ‘Kelkos’ nuk ka ndalur së vepruari. Unë kam marrë vendimet e gjykatës dhe do të shkojë që t’ia dorëzojë ministrit dhe kryesueses së Grupit Parlamentar për Mjedis,  Fitore Pacollit, që të kërkojnë të zbatohet vendimi i Gjykatës Supreme. Ne do presim disa ditë nga ministri dhe mos zbatimi i gjykatës është vepër penale dhe ne do të vazhdojmë me drejtësi”.

Mexhide Demolli-Nimani, drejtore ekzekutive e Lëvizjes FOL tha se fatkeqësisht tashmë rastet e Padive Strategjike Kundër Pjesëmarrjes Publike apo paditë SLAPP, janë pjesë e Raportit Vjetor të Komisionit Evropian për Kosovën.

“Në raportin vjetor për Kosovën të Komisionit Evropian vlerëson se gjatë vitit kishte rritje shqetësuese të Padive SLAPP të paraqitura në gjykata, padi këto të cilat përdoren për të kërcënuar dhe paditur gazetarët dhe aktivistët e shoqërisë civile në mënyrë që t’i frikësojnë ata”, tha ajo. Sipas saj, tërheqja e padive nga Kelkos vie si rezultat i kundërshtimit nga një numër i madh i organizatave dhe aktivistëve të shoqërisë civile në Kosovë, të cilët vazhdimisht kanë kërkuar nga Kelkos që të heqë dorë nga paditë ndaj aktivistëve. Madje edhe organizata ndërkombëtare për mbrojtjen e të drejtave të njeriut Amnesty International kishte kërkuar nga Kelkos në qershor të këtij viti që të tërhiqet nga paditë”.

“Unë ju bëj thirrje të gjithë aktivistëve apo gazetarëve, të cilët ballafaqohen me paditë SLAPP që të paraqiten tek Lëvizja FOL, sepse ne, përmes një grupi avokatësh të cilët kanë ofruar shërbimet e tyre pro bono për këto raste. Ne poashtu në kuadër të ueb faqes së Lëvizjes FOL tashme kemi filluar të bëjmë dokumentimin e padive SLAPP”.

Aktivistët ishin paditur për shpifje për shkak të deklaratave që kritikonin kompaninë në lidhje me operimet e hidrocentraleve në Grykën e Deçanit. Kelkos në qershor të vitit të kaluar ka kërkuar nga Shpresa Loshaj 100,000 euro kompensim dëmi për kinse “dëmtim të imazhit” për shkak të deklaratave të saj. Ndërkaq, nga Adriatik Gacaferi kanë kërkuar 10,000 Euro kompensim dëmi për shkak të një postimi në Facebook në lidhje me futjen e ujit të lumit në gypat e hidrocentraleve.

Lexo më shumë:

Të ngjashme