Stafeta 4×10 kilometra e Norvegjisë në skijim cross-country në konkurrencë të meshkujve, jo vetëm që u desh të përballej me 13 ekipe të tjera në shteg në garën e së dielës, por edhe me kërkesën e madhe të vendit për një medalje të artë olimpike, të cilën nuk e kishte fituar që nga viti 2002.

Norvegjia e siguroi atë të artë në një garë dramatike, ku i fundit në stafetë ishte Johannes Hoesflot Klaebo që mbajti nervat e para një vrulli që do të futet në librat e historisë të sportit norvegjez, shkruan Reuters.

“Unë nuk kam fjetur shumë mbrëmë, dhe nuk kam ngrënë shumë, por në fund është vetëm një garë normale me ski dhe duhet të merresh me gjërat më të thjeshta. Ndjeva pak presion, por mendoj se është më mirë nëse je pak nervoz, pasi je më i mprehtë. Mendoj se të gjithë kemi bërë një punë shumë të mirë. Në fund, të fitoj medalje të artë olimpike për skuadrën tonë, është e pabesueshme”, ka thënë Klaebo.

Skijimi cross-country në Norvegji është obsesion dhe miliona njerëz janë zgjuar për të shikuar garën e së dielës që me kohën norvegjeze ishte në ora 7 të mëngjesit.

I pari në stafetë, Didrik Toenseth ishte dhjetëvjeçar kur Norvegjia për herë të fundit fitoi të artën olimpike në këtë garë, dhe ai ishte në dijeni se sa me rëndësi ishte kjo fitore për norvegjezët.

“Nuk është se ata duan të artën, e presin këtë nga ne. Presioni ishte te ne, kjo ishte dita ku duhet të kishim sukses dhe asgjë nuk duhej të shkonte gabim”.