Në gusht të këtij viti, u arrestua Ibrahim Matoshi në Serbi dhe po mbahej në burg nën akuzat për terrorizëm. Ai ka shtetësi gjermane dhe ka hequr dorë nga shtetësia e Kosovës qysh në vitin 2015.

Zëvendëkryeministri i Kosovës, Behgjet Pacolli, ka njoftuar se ai është liruar.

“Sapo morra informacionin nga Zyra Ndërlidhëse e Republikës së Kosovës se avokati i z. Ibrahim Matoshi i ka informuar për lirimin e tij. Ne do t’presim për konfirmimin përfundimtar zyrtar dhe kthimin e z. Matoshi në territorin e Kosovës, ashtu që familjarët e tij, dhe të gjithë ata që janë marrë me këtë rast aktivisht, të ndjejmë lehtësim emocional e shpirtëror”, ka shkruar Pacolli në profilin e tij zyrtar në Facebook.

Edhe në këtë rast, thotë ai, sikurse në të gjitha rastet tjera, po dëshmohet që lojërat dhe sjellja e Serbisë shkon në kundërshtim total me të drejtat themelore të njeriut, me marrëdhëniet fqinjësore dhe me rregullat dhe vlerat e BE-së.

“Është koha e fundit që Serbia të ndalojë këtë fushatë dhe të respektoj parimet e lirisë së lëvizjes dhe dakordimet tjera me marrëveshjet e Brukselit. Lirimi i Matoshit na gëzon pa masë!”, ka shkruar Pacolli.

Kujtojmë se Matoshi akuzohej se ka vrarë dy serbë gjatë vitit 1999 në Kosovë.