Partia Demokratike e Kosovës (PDK), përmes një deklarate lëshuar për medie, falënderon secilin qytetar që besoi në vizionin, platformën dhe kandidatët e saj për kryetarë të Komunave dhe këshilltarë të Kuvendeve Komunale në zgjedhjet e fundit lokale që u zhvilluan në Republikën e Kosovës.

Por, ky subjekt politik ka njoftuar se qysh tani nisin përgatitjet për zgjedhje të brendshme partiake në të gjitha degët, nëndegët dhe seksionet.

“Kryetari i Partisë Demokratike të Kosovës, z. Kadri Veseli, në përputhje me vendimin që është marrë në mbledhjen e Këshillit Drejtues, më 29 korrik 2017, dhe në përputhje me Statutin e PDK-së, nga sot shpall zgjedhjet e brendshme partiake. Partia Demokratike e Kosovës fton të gjitha strukturat e veta, nëpër degë, nëndegë dhe seksione, të fillojnë përgatitjet për organizimin e zgjedhjeve të brendshme”, thuhet në deklaratë.

PDK thekson se mbetet lidere në shumë ndryshime, në sjelljen e figurave të reja në skenën politike, njerëz profesionistë, si dhe për hapësirën që u ka dhënë grave e të rinjve dhe do të vazhdojë edhe më fuqishëm në Konventën e ardhshme zgjedhore.

Në deklaratë po ashtu thuhet se Partia Demokratike e Kosovës pret numërimin e secilës votë, për ta çuar në vend vullnetin e plotë të qytetarëve, pasi që ende janë të panumëruara edhe mijëra vota me kusht nëpër disa komuna.

“Për këtë, ftojmë të gjitha institucionet përgjegjëse, si dhe partitë politike, që të kontribuojnë për një përfundim demokratik të këtij procesi zgjedhor – në të cilin u dëshmua demokraci e lartë e kulturë evropiane”, thuhet në komunikatën e PDK-së, vetëm një ditë pas votimeve të raundit të dytë.

Në zgjedhjet e djeshme, sipas rezultateve preliminare, PDK-ja ka fituar vetëm në katër komuna nga 10 në sa garonte. Nga komunat e mëdha, ajo ka arritur të marrë vetëm Ferizajn. Në Prizren, Shaqir Totaj është vetëm rreth 300 vota prapa kandidatit të Vetëvendosjes, Mytaher Haskuka, ndërsa kanë mbetur pa numëruar dhe rreth 150 vota me kusht.