​Komisioni Qendror i Zgjedhjeve, në ora 14:00, në një mbledhje të radhës, do të bëjë publike rezultatet e raportit të rinumërimit të 117 kutive të votimit, për të cilat PZAP kishte urdhëruar të numëroheshin edhe një herë.

“Sot (e mërkurë, 5 korrik, ora 14:00) Komisioni Qendror i Zgjedhjeve mban mbledhjen e radhës, ku është paraparë edhe një raport nga Qendra e Numërimit dhe Rezultateve”, ka njoftuar zëdhënësi i KQZ-së, Valmir Elezi.

Ndryshe, KQZ ka shpallur javën që shkoi rezultatet përfundimtare të zgjedhjeve të 11 qershorit, por pas ankesave në PZAP 117 vendvotime shkuan në rinumërim. Ndërsa, certifikimi i rezultateve pritet të ndodhë gjatë ditëve në vijim, pasi Gjykata Supreme të japë vendim për 8 ankesa të kandidatëve për deputetë.

Mediat kanë raportuar se rinumërimi i këtyre kutive ka sjellë disa ndryshime, për të paktën 3 kandidatë për deputetë.