Ministri i Arsimit, Shkencës dhe Teknologjisë, Arsim Bajrami dhe Ambasadori Amerikan në Kosovë, Greg Delawie, kanë nënshkruar sot Memorandumin e Mirëkuptimit për zhvillimin e Programit Fulbright, i cili financon shkëmbimin akademik, përkatësisht bursa studimore për studentët nga Republika e Kosovës në Shtetet e Bashkuara të Amerikës.

Në këtë ceremoni ishin të pranishëm personalitete të larta publike të vendit, përfshirë edhe kryetarin e Kuvendit, kryeministrin e Kosovës, ministra të Kabinetit Qeveritar, rektorë të universiteteve publike të Kosovës, si dhe profesorë e studentë.

Ministri i Arsimit, Shkencës dhe Teknologjisë, Arsim Bajrami, theksoi se Programi Fulbright ofron mundësi të shkëlqyeshme për shkëmbim akademik për të rinjtë, në drejtim të përgatitjes së një gjenerate të re, e cila do të jetë bartëse e tranzicionit dhe transformimit demokratik.

“Falënderojmë Qeverinë Amerikane, e cila po investon në edukim, sepse edukimi është çelësi i suksesit për shoqërinë tonë”, tha Ministri dhe në veçanti falënderoi ndihmës sekretaren e Shtetit për Edukim, Evan Ryan për telegramin e urimit që ka dërguar me rastin e nënshkrimit të Memorandumit.

Pasi që përmendi edhe Programin për Transformimin e Lidershipit, përmes të cilit më shumë se 180 studentë nga Kosova kanë pasur fatin të studiojnë në universitetet më të mira të ShBA-ve, ministri Bajrami tha se MAShT do të ofrojë mbështetjen e plotë që të punojmë me të gjitha forcat për një arsim konkurrent, i cili do të mundësojë zhvillimin ekonomik dhe do të përgatisë një gjeneratë, e cila do të marrë përsipër zhvillimin e Kosovës.

Ndërsa, kryetari i Kuvendit të Kosovës, Kadri Veseli, tha se falë saj, shumë të rinj tanë, kanë mundësinë të kenë qasje dhe studiojnë në institucionet arsimore prestigjioze të ShBA-ve, truallit të demokracisë dhe njëkohësisht, të zhvillimit ekonomik, ndërsa dijen dhe përvojën e fituar në këto institucione, ta investojnë në Kosovë.

Kryeministri i Kosovës, Isa Mustafa, e ka quajtur një ditë të rëndësishme nënshkrimin e memorandumit që mundëson shkollimin e studentëve dhe të rinjve në programin Fullbright, si një program tepër i rëndësishëm, i cili ka dhënë rezultate në përgatitjen e kuadrove të Kosovës për shkencë, arsim dhe ekonomi.

“Ne në Qeveri kemi dhënë zotimin tonë se ne do të përkrahim edhe për këtë vit edhe për vitet e ardhshme këtë program, i cili do t’iu mundësojë shumë të rinjve tanë që të studiojnë në nivele të ndryshme të studimeve në Shtetet e Bashkuara të Amerikës dhe që këto kuadro pastaj t’i kontribuojnë zhvillimit të institucioneve tona”, ka thwnw Mustafa.

Ambasadori Amerikan në Kosovë,  Greg Delawie, shprehi kënaqësinë për nënshkrimin e këtij Memorandumi të rëndësishëm për zhvillimin e Programit për 5 vitet e ardhshme.

Programi Fulbright është themeluar nga senatori William Fulbright në vitin 1945. Prej kësaj kohe, nga ky Program, kanë përfituar më shumë se 360 mijë studiues nga ShBA-të dhe nga e gjithë bota. Në Kosovë, Programi Fulbight (i cili kosiderohet si programi më me ndikim në botë), ka filluar në vitin 2009 dhe deri më tani kanë përfituar 84 studiues kosovarë.