Partia Socialdemokrate (PSD) ka mbajtur një aksion para Ministrisë së Punëve të Jashtme të Kosovës, të cilën e ka akuzuar se e ka kapur “flamurin” e mbrojtjes së skandalit të ambasadorit Martin Berishaj, raporton Ekonomia Online.
Ata para Ministrisë së Punëve të jashtme kanë ndërruara flamurët duke vendosur kartëmonedhë me 500 euro me fytyrën e ambasadorit të Kosovës në Kroaci.
Nol Nushi, sekretar organizativ i PSD-së, tha se kurrë në historinë e Kosovë nuk ka ndodhur që të ketë një ambasador të akuzuar për një varg shkeljesh e keqpërdorimesh.
Nushi tha se kanë informacione se Prokuroria tashmë ka ngritur kallëzim penal ndaj Berishajt
Ai shtoi se mos shkarkimi i tij, hedh dyshimet se në këtë skandal mund të jetë të përfshirë edhe krerët e shtetit nga presidentja Vjosa Osmani e kryeministri Albin Kurti.
Nushi pohoi se nuk do të ndalin aksionet deri në shkarkimin e Berishajt.
“Jemi para Ministrisë së Punëve të Jashtme të Kosovës, e cila e ka kapur flamurin e mbrojtjes së skandalit të Martin Berishajt. Kjo ministri nuk e përfaqëson më Kosovën, sepse siç e dini nuk ka asnjë aktivitet për përfaqësimin e Kosovës. Krejt mekanizimi i kësaj ministrie, praktikisht krejt mekanizmat shtetërorë janë vën në kor, në mbrojtje të skandalit Martin Berishaj”.
“Kurrë më parë një skandal i përmasave të këtilla nuk ka ndodhur në diplomacinë e Kosovës”.
“Po flasim për një ambasador që e ka kryer filozofinë, por nga dokumentet që po dalin për çdo ditë, po del se ai është një tregtar i energjisë, me qarkullime milionëshe. Ka tërhequr mjete kesh në Kosovë mbi një milion euro, para të cilat nuk i ka të deklaruara në asnjë institucion në Kosovë. Por nuk i ka të deklaruara as bizneset gjithandej Ballkanit. Pra nga një ministër i Kosovë po shndërrohet në skandal mbarëballkanik”.
Nushi tha se për mafinë e energjisë në rajon është e ditur si vepron, ku janë të përfshirë shumë sekserë e biznesmenë. “Një prej tyre duket se është edhe z. Berisha i cili është zënë në flagrancë duke tregtuar energji me GEN-in, me seli në Beograd, një kompani e anatemuar dikur nga vetë Kurti”.
Sekretari organizativ i PSD-së tha se në fillim dukej e çuditshme, por tashmë e kuptueshme, mbrojtja e pakusht që po i bëhet nga Kurti, Osmani e Gërvalla këtij ambasadori.
“Sot ministrja (Gërvalla) dha deklaratë ku tha se fola me ambasadorin Berishaj dhe gjithçka është në rregull sepse e njoh. Pra një skandal aq të madh ajo e redukton në një koincidencë personale më të duke thënë që i beson atij dhe jo fakteve”.
“Prokuroria me shumë gjasë tashmë ka ngritur kallëzim penal, ende nuk është zyrtare…” Nëse asgjë tjetër nuk vërtetohet, Nushi tha se fshehja e biznesit është e qartë se ka ndodhur.
“Mosshkarkimi i tij edhe mbrojtja e tij e vazhdueshme neve na bënë të besojmë që shiriti i shkeljeve mbërrin deri në krye të shtetit, deri të presidenca, të Kurti dhe te Gërvalla. Ne nuk do t’i lëmë rehat derisa ky shkarkim të ndodhë”, ka theksuar Nushi“.