Kryeministri i Spanjës, Mariano Rajoy, ka mbajtur një konferencë për media, pas ngjarjeve të sotme në Kataloni, ku u zhvillua një referendum i kontestuar për pavarësi ose jo të rajonit.

Lidhur me këtë referendum, që u refuzua nga Madridi zyrtar, ka folur kryeministri spanjoll Rajoy. Kreu i qeverisë ka thënë se mbajtja e një referendumi të paligjshëm është turp për demokracinë.

Rajoy ka deklaruar se “kurrfarë referendumi s’është mbajtur sot në Kataloni”.

“Shumica e madhe e Katalonisë nuk ka marrë pjesë në referendumin e sotëm, dhe e kanë respektuar ligjin, ka shtuar ai.

Rajoy ka thënë po ashtu se shpreson se udhëheqësit katalanas tani do të heqin dorë nga objektivat e tyre separatiste, dhe do t’i kthehen normalitetit politik.

Qendrat e votimit për referendumin e kontestuar të Katalonisë janë mbyllur në orën 8, sipas kohës lokale, ndërsa kutitë me vota raportohet të jenë dërguar në vende sekrete, për numërim.

Referendumi i paralajmëruar u ndalua nga dhuna policore në çdo zonë të Spanjës. Mbi 750 persona janë plagosur për shkak të forcës të ushtruar nga ana e policisë.