Mbrojtësi i Arsenalit, William Saliba, mund të mungojë deri në pesë muaj për shkak të dëmtimit serioz në shpinë që pësoi gjatë gjysmëfinales së Kupës së Botës mes Francës dhe Spanjës.

Futbollisti francez u detyrua të largohej nga fusha me dhimbje të mëdha gjatë pjesës së parë të humbjes së Francës ndaj kombëtares spanjolle.

Sipas raportimeve të mediave franceze, Saliba mund të humbasë edhe tre muajt e parë të sezonit 2026/27.

Saliba vuante prej muajsh nga dhimbjet

Mbrojtësi 25-vjeçar kishte disa muaj që përballej me probleme të vazhdueshme dhe të dhimbshme në shpinë, por kishte vazhduar të luante për Arsenalin dhe kombëtaren franceze.

Gjatë ndeshjes ndaj Spanjës, ai raportohet t’i ketë thënë partnerit të tij në mbrojtje, Dayot Upamecano: “Nuk mundem më, shpina ime ka përfunduar”.

Sipas gazetës franceze “L’Equipe”, Saliba mund të qëndrojë jashtë fushave nga katër deri në pesë muaj, nëse vendoset që ai t’i nënshtrohet ndërhyrjes kirurgjikale.

Futbollisti ende nuk ka reaguar publikisht për dëmtimin, por përpara fillimit të turneut kishte pranuar se nuk ishte në gjendje të plotë fizike.

“Kam pasur disa shqetësime të vogla prej disa muajsh”, kishte deklaruar Saliba.

“Kam shtrënguar dhëmbët sepse kishim Ligën e Kampionëve dhe Premierligën. Stafi teknik e ka menaxhuar situatën shumë mirë.”

“Kupa e Botës zhvillohet vetëm një herë në katër vjet, prandaj duhet të durosh. Nuk jam në 100 për qind të formës, por ka shumë lojtarë të tjerë që gjithashtu nuk janë plotësisht të gatshëm. Nuk mund të kërkojmë justifikime.”