Anëtarësimi i Kosovës në Interpol do të jetë në rend ditë gjatë muajit shtator kur asambleja e kësaj organizate do të mblidhet në Peking.

Mediet në Beograd shkruajnë se Serbia po bën gjithçka që është e mundur ta pengojë anëtarësimin në këtë organizatë, por organizata të ndryshme atje thonë se Serbia do të kishte dobi nga anëtarësimi i Kosovës.

Gazeta “Blic” shkruan se autoritetet në Prishtinë kanë tentuar të anëtarësohen që nga viti 2010 në këtë organizatë policore, por këto përpjekje janë ndalë për shkak të diplomacisë serbe, përcjell në shqip Gazeta Express.

Po ashtu rikujtohet se Interpol e ka pranuar aplikacionin e Kosovës për anëtarësim dhe se për këtë do të ketë debat në kryeqytetin kinez nga 26-29 shtator.

Në Serbi tashmë janë mobilizuar duke formuar një grup nga përfaqësues të Ministrisë së Punëve të Brendshme, të Punëve të Jashtme dhe nga Zyra për Kosovë në Qeverinë e Serbisë pasi me anëtarësimin eventual në këtë organizatë do të konfirmohej sovraniteti i Kosovës.

Maja Bjelos nga një OJQ serbe për politika të sigurisë thekson se politikanët në Serbi i frikësohen anëtarësimit të Kosovës sepse këtë e shohin si cështje të statusit të Kosovës, shkuan Gazeta Express.
Por, ajo thekson se anëtarësimi i Kosovës do t’i kontribuonte zgjidhjes së problemeve të sigurisë dhe se nga kjo do të kishte dobi Serbia sikurse edhe shtetet tjera të rajonit.

Bogoljub Milosavljevic, profesor dhe ekspert i çështjeve të sigurisë thotë se anëtarësimi i Kosovës në Interpol do të ishte i dobishëm për qytetarët e Serbisë, përderisa politikisht kjo do të mund të trajtohej si një hapje e rrugës drejtë anëtarësimit në OKB.

Bojan Kostres, politikan nga Vojvodina thotë se Serbia do duhej ta përkrahte anëtarësimin e Kosovës në Interpol pasi në këtë mënyrë do të kontrollohej kriminaliteti në një territor në të cilin Serbia s’ka kontroll.