“Shkodra Elektronike” shfaq sonte koncert në Prishtinë për Ditë të Çlirimit, pritet nga kryetari Rama

Përfaqësuesit e Shqipërisë në Eurovision 2025, grupi Shkodra Elektronike, do të mbajnë koncertin e tyre të parë në Kosovë, sonte më 16 qershor, në AMC Hall, duke nisur nga ora 20:00, në kuadër të festimeve për Ditën e Çlirimit të Kosovës, raporton Ekonomia Online.

Kryetari i Prishtinës, Përparim Rama, tha se na kanë nderuar që janë sot këtu.
“Ne i kemi në Prishtinë për nder të Ditës së Çlirimit të Kosovës. Na kanë nderuar. Sot do të jetë koncert i paharrueshëm “, tha Rama.

Anëtari i grupit, Kolë Laca, tha se është nder i madh të jenë këtu në këtë ditë kaq të veçantë.

“Është nder i madh me qenë në këtë ditë kaq të veçantë për Prishtinën dhe Kosovën. Si kemi filluar me organizim me dashuri po shkon. Është nder i madh të marrim çmimin ‘Hyjnesha në Fron”, tha Laca.

Ndërsa, Beatriçe Gjergji tha se shpreson të festojnë bukur.

“Është nder i madh të jesh këtu për festën tuaj dhe shpresojmë ta festojmë mirë”, shtoi Gjergji.