Në 24 orët e fundit në Shqipëri janë regjistruar 844 raste të reja me coronavirus nga 7.725 testime të kryera dhe tre persona kanë vdekur, ka bërë të ditur Ministria e Shëndetësisë.

Numrin më të lartë të infektimeve të reja e mban Tirana me 246 raste. Aktualisht janë 7.070 pacientë aktivë në të gjithë vendin, ndërsa në Spitalin Infektiv po marrin trajtim 91 pacientë.

Fatkeqësisht tre persona kanë ndërruar jetë në 24 orët e fundit si pasojë e COVID-19, mes tyre një 20-vjeçar nga Korça, i cili vuante nga sëmundje të tjera bashkëshoqëruese, një 69-vjeçar nga Shkodra dhe një 81-vjeçar nga Vlora.

Që nga fillimi i epidemisë me coronavirus në Shqipëri janë regjistruar 141.365 raste pozitive, prej tyre 131.812 janë shëruar, 7.070 janë aktive, ndërsa betejën me sëmundjen e rrezikshme e kanë humbur 2.483 persona.