President i Komitetit Olimpik të Kosovës, Besim Hasani ka dërguar një telegram ngushëllimi për ndarjen nga jeta të gazetarit Avni Shabani, raporton Ekonomia Online.

Hasani thotë se gazetari Shabnai do të mbahet në mend si një bashkëpuntor dhe profesionist i madh, i cili me butësinë dhe virtytet e tij, la gjurmë të pashlyera në gazetarinë sportive dhe sportin në përgjithësi.

Tutje mund ta lexoni telegram ngushëllimi e plotë:

E nderuara familja, Shabani

Me dhimje dhe pikëllim të thellë morëm lajmin e trishtë për ndarjen nga jeta të gazetarit të mirënjohur sportiv, Avni Shabani.

Vetëm pak javë pas pensionimit nga mikrofoni dhe lapsi, të cilëve ua kushtoi një jetë duke punuar në të përditshmen Rilindja dhe Radio Kosova, Avniu na la përjetësisht!

Avniu do të kujtohet përgjithmonë nga Lëvizja Olimpike e në veçanti nga Komiteti Olimpik i Kosovës, ku me praninë e tij, solli intervista dhe reportazhe të ndryshme, duke u shndërruar në zë i fuqishëm i aktiviteteve tona.

Miku im, do të mbahesh mend si një bashkëpuntor dhe profesionist i madh, i cili me butësinë dhe virtytet e tij, la gjurmë të pashlyera në gazetarinë sportive dhe sportin në përgjithësi.

Në emër të Komitetit Olimpik të Kosovës dhe gjithë Lëvizjes Olimpike në Kosovë, i shpreh ngushëllimet më të sinqerta familjes së tij, Shoqatës së Gazetarëve të Kosovës, Radio Kosovës dhe gjithë miqëve të tij.