Udhëheqësit e Bashkimit Europian, Ursula von der Leyen dhe Charles Michel kanë nënshkruar sot zyrtarisht marrëveshjen e Brexit.

Kjo ndodhi siç shihet në pamje, në një atmosferë të zymtë ceremoniale, ndërsa Brukseli përgatitet për daljen e Britanisë së Madhe nga BE në shtatë ditët e ardhshme, njofton Klan Kosova.

Në fotografitë e lëshuara në ceremoninë e nënshkrimit në ndërtesën e BE-së në mëngjes, negociatori kryesor i bllokut, Michel Barnier, mund të shihet duke qëndruar pas dy presidentëve.

Me këtë rast Charles Michel, lëshoi ​​një deklaratë të shkurtër.

“Gjërat do të ndryshojnë në mënyrë të pashmangshme, por miqësia jonë do të mbetet. Ne fillojmë një kapitull të ri si partnerë dhe aleatë”, tha ai.

Ndërsa Von der Leyen u shpreh: “Charles Michel dhe unë sapo kemi nënshkruar marrëveshjen për tërheqjen e Britanisë së Madhe nga BE, duke hapur rrugën për ratifikimin e saj nga Parlamenti Europian”, njofton Klan Kosova.

Dokumenti, i cili shkon në afro 600 faqe, përmban çështje të ndryshme të marrëveshjes përfshirë të drejtat e qytetarëve, detyrimet financiare në Mbretërinë e Bashkuar për bllokun dhe protokollin e Irlandës Veriore, duke vendosur rregulla për mirëmbajtjen e një kufiri të hapur në ishullin e Irlandës.