Universiteti i Prishtinës mbështet Programin Nacional për Rininë

Prishtinë | 28 Maj 2019 | 19:02 | Nga Ekonomia Online

Universiteti i Prishtinës “Hasan Prishtina” do të jetë pjesë e Programit Nacional për Rininë. Kjo pasi Koordinatori Nacional për Kulturë, Rini dhe Sport në Qeverinë e Kosovës, Rexhep Hoti, nënshkroi marrëveshje bashkëpunimi me Rektorin e këtij universiteti, Marjan Dema.

Marrëveshja e bashkëpunimit me Universitetin e Prishtinës “Hasan Prishtina”, përcakton angazhimet e ndërsjella të palëve nënshkruese për implementimin e Programit Nacional për Rininë dhe organizimet e përbashkëta të aktiviteteve që kanë të bëjnë me përfshirjen e studentëve në garat Nacionale të Kreativitetit Kulturor dhe Mendimit Kritik si dhe Garat Nacionale të Sport.

Nënshkrimi i kësaj marrëveshje mundëson organizimin e garave të nivelit universitar për të gjithë studentët e Universitetit të Prishtinës “Hasan Prishtina”, në garën e Debatit e cila organizohet në kuadër të Garës Nacionale të Kreativitetit Kulturor dhe Mendim Kritik.

Ndërsa, në platformën e sportit do të garohet në gjithsej pesë sporte, në Futsall, Basketboll, Volejboll, Atletikë dhe Shah.

Përveç Universitetit të Prishtinës, Koordinatori Nacional për Kulturë, Rini dhe Sport ka nënshkruar marrëveshje bashkëpunimi për implementimin e Programin Nacional për Rininë edhe me shtatë universitete dhe kolegje në Republikën e Kosovës.​

Fjalë Kryesore:

Të ngjashme