Asociacioni i Gazetarëve të Kosovës (AGK) dhe disa organizata të shoqërisë civile kanë dënuar largimin e gjashtë redaktorëve të RTK-së dhe e cilësuan këtë si ndërhyrjen e radhës që cenon pavarësinë e medias publike, transmeton Ekonomia Online.

Në një deklaratë të përbashkët të tyre, të postuar në Facebook, organizatat thonë se RTK-ja prej vitesh ballafaqohet me presione politike dhe ndërhyrje në menaxhment, ndërsa ky veprim përforcon shqetësimet për kufizimin e lirisë së fjalës dhe pavarësisë profesionale.

Organizatat kanë kërkuar anulimin e menjëhershëm të vendimit.

Deklarata e plotë:

Organizatat e poshtëshënuara të shoqërisë civile, qëndrojnë në solidaritet të plotë me gjashtë redaktorët e Radio Televizionit të Kosovës (RTK) pas njoftimit se janë larguar nga moderimi i magazinave informative që kanë drejtuar.

Sipas njoftimit të gazetarëve Blerta Foniqi-Kabashi, Meneta Zekaj-Nushi, Jehona Zhitia, Arton Mulliqi, Edona Musa-Mustafa dhe Valon Bajrami ata “janë larguar në mënyrë arbitrare dhe antiligjore”.

Ne konsiderojmë që ky vendim përbën ndërhyrjen e radhës në pavarësinë e transmetuesit publik, dhe është bërë pak kohë pasi këta redaktorë kanë sfiduar me pyetje në emisionet e tyre përkatëse njerëz të pushtetit, dhe pasi kanë ngritur zërin e tyre për vonesat tre javore të pagave.

RTK është ballafaquar me ndërhyrje të vazhdueshme politike ndër vite, dhe në vitet e fundit edhe me shkurtim të buxhetit dhe ndërhyrje politike nëpërmjet emërimeve në menaxhment.

Ne kërkojmë nga menaxhmenti i RTK-së që të anulojë vendimin për largimin e redaktorëve nga ekrani televiziv, dhe çdo ndryshim në të ardhmen të bëhet në dialog me redaktorë dhe duke respektuar kontratat e punës.

Transmetuesi publik ka rol të rëndësishëm për informim të publikut dhe gazetarët, redaktorët dhe pjesa tjetër e stafit të RTK-së duhet të lejohen të punojnë pa presion politik dhe financiar.

Organizatat e shoqërisë civile çmojnë guximin e redaktorëve për të sfiduar publikisht vendimet arbitrare dhe cenzuruese, dhe u ofrojnë përkrahje në ndjekjen e rrugëve ligjore për të anuluar vendimin që i largon ata nga ekrani televiziv.

Asociacioni i Gazetarëve të Kosovës
Rrjeti i Grave Gazetare të Kosovës
Flutura Kusari
OJQ Pishtarët
Qendra për Zhvillimin e Grupeve Shoqërore (CSGD)
Instituti i Prishtinës për Studime Politike (PIPS)
Rrjeti i Grave të Kosovës
Lëvizja FOL
Grupi për Studime Juridike dhe Politike (GLPS)
Instituti i Kosovës për Drejtësi
Nisma e të Rinjve për të Drejtat e Njeriut – Kosovë
Community Building Mitrovica
CEL Kosova
Democracy Plus (D+)
Kosova – Women 4 Women
Instituti Kosovar për Hulumtim dhe Zhvillim të Politikave (KIPRED)
YMCA Movement
ÇOHU/Preportr
Instituti Sekhmet
Instituti Demokratik i Kosovës
Iniciativa Kosovare për Stabilitet – IKS