Presidentja e Kosovës, Vjosa Osmani ka zhvilluar sot takimin me Këshillin Konsultativ për Komunitete.

Në njoftimin e presidencës bëhet e ditur se gjatë këtij takimi janë shqyrtuar çështje të rëndësishme që lidhen me nevojat dhe prioritetet e komuniteteve në vend, me fokus në pjesëmarrjen e tyre të barabartë në jetën shoqërore, institucionale dhe ekonomike.

“U theksua se përfshirja e komuniteteve në proceset shtetërore është thelbësore për realizimin e të drejtave të tyre, përfshirë të drejtat sociale, dhe për ndërtimin e një shoqërie gjithëpërfshirëse ku çdo qytetar gëzon trajtim të barabartë”, thuhet në njoftim.

Anëtarët e Këshillit shprehën mirënjohjen e tyre për Osmanin, duke vlerësuar lartë përkushtimin e saj në adresimin dhe përkrahjen e çështjeve të komuniteteve, si dhe gatishmërinë e saj për të qenë gjithmonë pranë tyre në zgjidhjen e sfidave dhe avancimin e të drejtave të barabarta për të gjithë.