Këshilli Gjyqësor i Kosovës (KGJK), në mbledhjen e 363-të, ka marrë vendim që Gjykata Administrative të fillojë punën nga data 5 maj 2026.

Kryesuesi i KGJK-së, Albert Zogaj tha se kjo datë është brenda afateve ligjore.

Gjithashtu, Zogaj tha se gjatë kësaj periudhe do të ndërmerren veprime për transferim të lëndëve.

Ndërkaq, u bë e ditur se janë shpallur dy konkurse, i pari më 26 dhjetor 2025 ndërsa i dyti më 12 shkurt 2026.

Gjykata Administrative do të funksionojë si gjykatë e shkallës së parë, me juridiksion në tërë territorin e Republikës së Kosovës. Ajo do të jetë kompetente për shqyrtimin dhe vendosjen e të gjitha konflikteve administrative, përfshirë edhe kontestet që rrjedhin nga marrëdhëniet e punës në sektorin publik, në përputhje me legjislacionin në fuqi.

Gjyqtarët e departamentit administrativ nga Gjykata Themelore në Prishtinë që nisin punën më 5 maj janë:

Bekim Maloku, Driton Nocaj,  Blerim Beshtica, Kaltrinë Emini, Jeton Krasniqi, Rexhep Bllaca, Rovena Kastrati, Albana Çeku.

Ndërsa gjyqtarët që nisin punën më 1 korrik 2026 janë: Senad Elshani, Medina Rama-Xhemali, Berkan Hamza, Andrra Fazliu dhe Rigë Sylaj.