Partia Demokratike kërkoi sot shpalljen “non grata” të ministres serbe të Administratës Publike dhe Vetëqeverisjes Lokale, Snezhana Paunoviç, si edhe paditjen e saj për nxitje të gjenocidit, pas një deklarate lidhur me ngjarjet në Kosovë gjatë vitit 1998.

Në një deklaratë për mediat, zëdhënësja e Partisë Demokratike, Floriana Garo, e cilësoi deklaratën e ministres serbe si “ultraraciste dhe antishqiptare”.

Sipas Garos, deklarata e Paunoviç përbën një justifikim të spastrimit etnik dhe të krimeve të kryera gjatë luftës në Kosovë.

Partia Demokratike dënoi deklaratën, duke e cilësuar atë si nxitëse të urrejtjes dhe në kundërshtim me parimet themelore të të drejtave të njeriut.

Partia Demokratike theksoi se, “shpallja e saj non grata dhe paditja për nxitje të gjenocidit janë të vetmet qëndrime që ajo meriton”.