Në pritjen e organizuar nga Ambasada e Francës me rastin e shënimit të Ditës Kombëtare të Republikës së Francës, kryeministri në detyrë, Albin Kurti, tha se Franca ka qenë mike dhe aleate e Kosovës në momentet më të rëndësishme për vendin.

“E lindur nga lufta për çlirim dhe drejtësi, Kosova ka zgjedhur demokracinë dhe lirinë, sundimin e ligjit dhe të drejtat e njeriut, jo si gjuhë formale, por si themele të shtetit. Për ne, Franca ka qenë mike dhe aleate në momente vendimtare. Ajo qëndroi pranë popullit tonë gjatë luftës, e njohu pavarësinë e Kosovës një ditë pas shpalljes së saj dhe ka vazhduar të na mbështesë në forcimin e shtetit dhe demokracisë sonë”, tha Kurti.

Ai theksoi se partneriteti ndërmjet Kosovës dhe Francës po bëhet gjithnjë e më konkret.

“Sot, partneriteti ynë po bëhet më konkret dhe më thelbësor. E shohim këtë përmes dialogut politik, bashkëpunimit institucional, angazhimit kulturor dhe shkëmbimeve arsimore. Ai nuk kufizohet në deklarata; ai shndërrohet në punë, ndërton besim dhe i shërben një qëllimi. Dhe për Kosovën, ky qëllim është gjithashtu evropian. Rruga jonë drejt Bashkimit Evropian nuk është vetëm një proces anëtarësimi. Ajo është një zgjedhje demokratike, një disiplinë institucionale dhe një vend i natyrshëm ndër shtetet e Evropës”, u shpreh ai.

Kurti falënderoi ambasadorin e Francës në Kosovë, Olivier Guérot, për kontributin gjatë mandatit të tij.

“Kjo mbrëmje ka një domethënie të veçantë, pasi shënon Ditën tuaj të fundit Kombëtare në Kosovë në cilësinë e Ambasadorit. Gjatë mandatit tuaj, ju e keni përfaqësuar vendin tuaj me dinjitet dhe jeni angazhuar me vendin tonë me hapje dhe mirësjellje, duke i afruar edhe më shumë dy vendet tona. Në emër të Qeverisë së Republikës së Kosovës, ju falënderoj për kontributin dhe partneritetin tuaj. Kudo që t’ju çojë misioni juaj i ardhshëm, Kosova do të mbetet gjithmonë një vend miqsh”, tha Kurti.

Në fund, ai uroi Francën për festën kombëtare.

“Në këtë Ditë Kombëtare, ne nderojmë Francën, popullin francez dhe idealet që janë përcjellë nëpër histori dhe ndahen mes republikave. Gëzuar 14 Korrikun! Uroj që Franca të vazhdojë të përparojë dhe që miqësia ndërmjet dy vendeve tona të bëhet gjithnjë e më e fortë”, deklaroi Kurti.