Federata Meksikane e Futbollit ka dalë hapur në mbështetje të presidentit të FIFA-s, Gianni Infantino, duke u distancuar nga qëndrimi i Concacaf dhe duke thelluar përçarjet brenda futbollit botëror.

Meksika, e cila ishte një nga bashkëorganizatorët e Kupës së Botës 2026, ka deklaruar se e mbështet lidershipin e Infantinos, pavarësisht presionit të madh që po përballet presidenti i FIFA-s pas krizës së fundit rreth planit për investime private në turnetë e FIFA-s.

“FMF mbështet lidershipin e presidentit Infantino në vazhdimin e promovimit të zhvillimit të futbollit përmes forcimit institucional”, thuhet në deklaratën e Federatës Meksikane.

Federata meksikane gjithashtu është rreshtuar me Conmebol në kundërshtimin e çdo përpjekjeje për largimin e Infantinos pa një votim ku të përfshihen të gjitha 211 federatat anëtare të FIFA-s.

“FMF nuk do të njohë apo miratojë asnjë proces të thirrur jashtë këtij kuadri institucional”, thuhet më tej në deklaratë.

Qëndrimi i Meksikës bie ndesh me atë të Concacaf, e cila ka kërkuar një “llogari gjithëpërfshirëse” për presidencën e Infantinos. Konfederata e Amerikës së Veriut, Qendrore dhe Karaibeve e ka cilësuar propozimin për investime private si një tjetër shenjë të problemeve në drejtimin e FIFA-s.

Përçarje edhe në Europë
Kriza është edhe më e madhe në Europë, ku UEFA ka deklaruar se e ka humbur besimin te Infantino dhe ka paralajmëruar se ekipet europiane mund të bojkotojnë Kupën e Botës.

UEFA ka bërë të ditur se tërheqja e planit për investime private nuk është e mjaftueshme dhe kërkon garanci se tentativa të tilla nuk do të përsëriten.

Ndërkohë, Federata Angleze ka tërhequr mbështetjen për Infantino, ndërsa edhe federata të tjera europiane, përfshirë Uellsin, Shqipërinë dhe Kroacinë, janë distancuar nga presidenti i FIFA-s.

Në anën tjetër, CAF vazhdon ta mbështesë unanimisht Infantinon, ndërsa edhe Argjentina ka vlerësuar qëndrimin e tij për të pranuar dhe kërkuar falje për gabimet e bëra.

Infantino e tërhoqi propozimin për investime private pas presionit të madh ndërkombëtar, ndërsa FIFA pranoi se kishte pasur “gabime” në mënyrën se si ishte menaxhuar procesi.

Megjithatë, tërheqja e planit nuk e ka mbyllur krizën. Përkundrazi, rasti ka nxjerrë në pah çarjet e thella mes federatave dhe konfederatave rreth mënyrës se si duhet të drejtohet FIFA.