Drejtori ekzekutiv i Institutit të Kosovës për Drejtësi (IKD), Ehat Miftaraj, ka ngritur akuza të forta ndaj dy figurave të Lëvizjes Vetëvendosje, Albulena Haxhiut dhe Arbërie Nagavcit.

Në një reagim të tij, Miftaraj pretendon se Haxhiu dhe Nagavci janë pasuruar përtej mundësive që ua siguron paga nga buxheti i Kosovës, duke përmendur edhe pasuri të paluajtshme me vlerë të konsiderueshme.

Sipas tij, njëra prej tyre posedon një banesë në Dragodan me vlerë prej 128 mijë eurosh, ndërsa tjetra një shtëpi në Sofali, me vlerë prej rreth 200 mijë eurosh.

“Albulena Haxhiu dhe Arbërie Nagavci janë nga ata eksponentë të VV-së të cilët janë pasuruar përtej mundësive buxhetore që ua siguron paga nga buxheti i Kosovës”, ka shkruar Miftaraj.

Ai ka kritikuar gjithashtu qëndrimet publike të dy deputeteve të VV-së, duke pretenduar se zëri i tyre nuk lidhet me interesin e shtetit apo parimet politike, por me, siç shprehet ai, vazhdimin e “kapjes së shtetit”.

“Zëri i tyre i zhurmshëm nuk është as për shtet as për parime, veç me vazhdu kapjen e shtetit që me jetu si në përralla në shtetin më të varfër në Evropë”, ka deklaruar Miftaraj.

Në fund, ai ka shtuar: “Albulena e Arbërie ka shumë në LVV.”

Pretendimet e Miftarajt janë deklarata të tij dhe kërkojnë verifikim të pavarur përpara se të paraqiten si fakte të vërtetuara.