Kryeministri izraelit Benjamin Netanyahu vizitoi fshehurazi Emiratet e Bashkuara Arabe të dielën dhe u takua me presidentin e vendit, Sheikh Mohammed bin Zayed, i tha CNN një burim izraelit i njohur me vizitën.

Burimi tha se Irani dominonte agjendën, një fushë ku të dy vendet kanë thelluar bashkëpunimin e tyre, përfshirë gjatë luftës aktuale me Iranin.

Zyra e Kryeministrit izraelit nuk e konfirmoi vizitën. CNN iu drejtua Ministrisë së Jashtme të Emirateve të Bashkuara Arabe për një koment.

Udhëtimi i rrallë, nëse konfirmohet, vjen saktësisht një muaj para zgjedhjeve të 27 tetorit në Izrael dhe në sfondin e një polemike të shtuar politike në Izrael lidhur me raportimet e Haaretz dhe The New York Times, sipas të cilave Bin Zayed e kishte paralajmëruar Netanyahun për një operacion të madh të Hamasit disa ditë para sulmit të 7 tetorit 2023.

The Atlantic raportoi veçmas se shefi i inteligjencës egjiptiane Abbas Kamel fluturoi drejt Izraelit më 26 shtator 2023 për të paralajmëruar se Gaza do të “shpërthente”. Ndërsa të dielën, The Wall Street Journal raportoi se kishte të paktën tre paralajmërime egjiptiane të përcjella te Izraeli lidhur me Gazën, i fundit prej të cilëve ishte në një telefonatë me Netanyahun, vetëm disa ditë para sulmit.

Zyra e Netanyahut ka mohuar vazhdimisht se ka marrë ndonjë paralajmërim dhe i ka hedhur poshtë raportimet si gënjeshtra të sajuara, që synojnë ta dëmtojnë atë në aspektin elektoral. Por rivalët e tij i kanë përdorur pretendimet për ta bërë përgjegjësinë për dështimin për të parandaluar sulmin e 7 tetorit 2023 një çështje qendrore të fushatës.

Pas raportimeve fillestare për një paralajmërim nga Bin Zayed, Ministria e Jashtme e Emirateve tha në fillim të këtij muaji se “nuk komenton mbi raportimet e mediave apo spekulimet lidhur me bisedat mes liderëve qeveritarë”, por nuk e mohoi telefonatën. “Kur është e nevojshme, të gjitha informacionet përkatëse të inteligjencës janë komunikuar dhe vazhdojnë të komunikohen mes institucioneve përkatëse”, thuhej në deklaratë.

Në atë kohë, një burim izraelit i njohur me çështjen tha se zyra e Netanyahut u përpoq ta bindte Emiratet ta mohonin raportimin, por Emiratet ranë dakord vetëm të nxirrnin një deklaratë lidhur me shkëmbimin e informacioneve të inteligjencës.

Partia Likud e Netanyahut më pas publikoi një deklaratë, të postuar në llogarinë e kryeministrit në X, ku pretendonte se kishte “ndërhyrje të hapur të huaj” në zgjedhjet e Izraelit nga politikani palestinez me bazë në Emirate, Mohammed Dahlan. Partia nuk paraqiti prova për këtë pretendim.

Ndërkohë, rivalët e Netanyahut janë kapur pas paralajmërimit të raportuar për të rinovuar sulmet e tyre ndaj mënyrës se si ai i trajtoi ngjarjet që i paraprinë 7 tetorit.

Gadi Eizenkot, i cili aktualisht del në sondazhe si sfiduesi kryesor i kryeministrit në zgjedhjet e ardhshme në Izrael, tha të shtunën se zbulimi lidhur me paralajmërimin “nuk lë vend për dyshim: Netanyahu e udhëhoqi, me verbëri, arrogancë dhe papërgjegjshmëri, Shtetin e Izraelit drejt katastrofës më të madhe në historinë e tij”.

Në maj, zyra e Netanyahut tha se kryeministri kishte vizituar fshehurazi Emiratet e Bashkuara Arabe në mars, gjatë ditëve të para të luftës me Iranin, duke e cilësuar atë një “thyerje historike”. Megjithatë, Ministria e Jashtme e Emirateve në atë kohë e mohoi pretendimin e tij si “krejtësisht të pabazuar”.

Gjatë luftës, raportohet gjithashtu se Izraeli kishte vendosur një sistem të mbrojtjes raketore Iron Dome në Emirate dhe zyrtarët izraelitë kanë thënë se bashkëpunimi i sigurisë mes dy vendeve arriti nivele të paprecedenta.

Netanyahu nuk ka bërë kurrë një vizitë zyrtare në Emiratet e Bashkuara Arabe të pranuar publikisht.