Alina Habba Mildon, e cila kishte qenë një nga avokatet personale të presidentit Donald Trump, hyri furishëm në Zyrën Ovale javën e kaluar, me synimin për të rrëzuar një tjetër aleat të njohur të presidentit.

Shënjestra e saj ishte Richard Grenell, i cili më herët kishte shërbyer si i dërguar i posaçëm i zotit Trump për Venezuelën dhe si drejtues i Qendrës së Arteve Performuese John F. Kennedy, shkruan New York Times.

Zonja Mildon sapo ishte martuar me një investitor turk, Turhan Mildon, i cili ka interesa të shumta biznesore në Venezuelë.

Gjatë vitit të kaluar, ai kishte qenë në kontakt të rregullt me zotin Grenell, si për çështjet që lidhen me Venezuelën, ashtu edhe për mbështetjen e Qendrës Kennedy.

Por tani, zonja Mildon po i thoshte zotit Trump se Grenell kishte keqpërdorur miliona dollarë që bashkëshorti i saj ia kishte dërguar në vitin 2025, me qëllim që ato të përdoreshin për Qendrën Kennedy.

Një avokat i zotit Mildon e pasoi këtë javë këtë pretendim duke i dërguar Shtëpisë së Bardhë dokumente që synonin ta mbështesnin akuzën.

 Mes tyre ishte edhe një mesazh tekstual, në të cilin Grenell pretendohej të kishte thënë se dëshironte ta bënte zotin Mildon “fytyrën amerikane në terren në V”, duke iu referuar Venezuelës.

Zoti Grenell i mohoi akuzat, duke i cilësuar ato absurde.

Ajo që ka ndodhur në të vërtetë tashmë është në qendër të një stuhie në Shtëpinë e Bardhë, e cila e ka lënë Will Scharfin, këshilltarin ligjor të Shtëpisë së Bardhë, me detyrën për të përcaktuar se kush po thotë të vërtetën.

Akuzat janë pjesë e një beteje të gjatë mes aleatëve dhe mbështetësve të zotit Trump për të përfituar nga pasuritë e Venezuelës, burimet natyrore të së cilës tani janë efektivisht nën kontrollin amerikan.

Ky artikull, shkruan New York Times, bazohet në intervista me më shumë se një duzinë personash që kanë njohuri për ngjarjet.

Shumica folën në kushte anonimiteti, për të diskutuar akuzat dhe takimin privat në Zyrën Ovale.

Zonja Mildon shkoi në Shtëpinë e Bardhë të premten, pasi The New York Times i dërgoi zotit Mildon një sërë pyetjesh lidhur me interesat e tij të biznesit në Venezuelë dhe marrëdhëniet e tij me aleatët e Trumpit.

Në Zyrën Ovale, zonja Mildon i tha zotit Trump se, në maj të vitit 2025, bashkëshorti i saj kishte transferuar 17.6 milionë dollarë në një llogari, sipas udhëzimeve të zotit Grenell, thanë personat e informuar për këtë çështje.

Sipas tyre, versioni fillestar i rrëfimit të saj ndryshonte, por ajo përfundimisht pretendoi se pjesa më e madhe e parave ishte për një transaksion biznesor, hollësitë e të cilit mbeten të paqarta.

Ajo i tha presidentit se zoti Mildon besonte që 5.6 milionë dollarë nga shuma e përgjithshme do të ndaheshin për Qendrën Kennedy.

Por, sipas saj, paratë nuk arritën kurrë te qendra.

Zoti Trump, i cili e kishte emëruar veten kryetar të Qendrës Kennedy, thirri zotin Scharf në Zyrën Ovale për të dëgjuar akuzat e zonjës Mildon.

Të mërkurën në mbrëmje, avokati i zotit Mildon i dërgoi zotit Scharf mesazhe tekstuale dhe një dëshmi të transfertës bankare për të mbështetur pretendimet e zonjës Mildon, sipas dy personave të njohur me rrjedhën e ngjarjeve.

New York Times nuk e ka verifikuar vërtetësinë e akuzave të zonjës Mildon, të cilat u raportuan për herë të parë të mërkurën nga Axios.

Zoti Grenell tha se nuk ka pasur asnjë transaksion financiar mes tij dhe zotit Mildon, apo mes tij dhe subjekteve të lidhura me këtë të fundit.

“Unë kurrë nuk kam kërkuar që të dërgohet as edhe një cent diku tjetër, duke pretenduar se ishte për Qendrën Kennedy, dhe nuk kam marrë kurrë asnjë pagesë prej tij”, tha zoti Grenell.

Mosmarrëveshja përqendrohet te një transfertë bankare prej miliona dollarësh që zoti Mildon ia bëri një kompanie teksane të pajisjeve të mbrojtjes dhe sigurisë, të quajtur TX-AT.

Zonja Mildon i tha Shtëpisë së Bardhë se transferta ishte bërë me udhëzimet e zotit Grenell.

Zoti Grenell tha se kishte punuar si konsulent për TX-AT në vitin 2024, por se nuk kishte asnjë lidhje me kompaninë në kohën kur, sipas zotit Mildon, ishte kryer transferta.

Grenell tha gjithashtu se nuk kishte kërkuar kurrë pagesa në emër të kompanisë.

Përfaqësuesit e TX-AT nuk iu përgjigjën disa kërkesave për koment.

Zoti dhe zonja Mildon refuzuan të komentonin, ashtu si edhe zoti Scharf, i cili kishte marrë pjesë në dasmën e çiftit muajin e kaluar.

Shtëpia e Bardhë nuk iu përgjigj një kërkese për koment.

Një zëdhënës i Qendrës Kennedy tha se institucioni po kryen një shqyrtim të brendshëm të zotimeve dhe fondeve përkatëse dhe se rezultatet do t’ia paraqesë bordit të tij.

Vitin e kaluar, ndërsa zoti Mildon po përpiqej të krijonte lidhje me administratën Trump, ai u bë mysafir i shpeshtë në Qendrën Kennedy, ku krijoi kontakte me republikanë të njohur dhe përfundimisht takoi gruan e tij të ardhshme, zonjën Mildon.

Pas një koncerti gala, ai premtoi të dhuronte 270 mijë dollarë.

Pagesën e kreu vetëm këtë javë, pasi The New York Times e pyeti pse nuk e kishte përmbushur më herët atë zotim.

Zoti Mildon dhe zoti Grenell kishin një interes të përbashkët për Venezuelën.

Mildon ka interesa të shumta biznesore atje, ndërsa Grenell, në atë kohë, shërbente si i dërguar i posaçëm i zotit Trump për këtë vend.

Të dy kishin tentuar të ndikonin në politikën e Trumpit ndaj Venezuelës në mënyrë që të përfitonin vetë.

Në fund, të dy u lanë mënjanë nga sekretari i Shtetit, Marco Rubio, i cili në mesin e vitit 2025 miratoi një qasje më agresive, që çoi në rrëzimin e presidentit Nicolás Maduro dhe vendosjen në pushtet të pasuesit të zgjedhur nga zoti Rubio.

Një nga dokumentet që avokati i zotit Mildon i dërgoi Shtëpisë së Bardhë përmban një mesazh tekstual të majit 2025, i cili pretendohet se është dërguar nga zoti Grenell dhe ku ai shprehte dëshirën për ta bërë zotin Mildon “fytyrën amerikane në terren në V”, duke iu referuar Venezuelës.

Zoti Grenell tha se nuk e kishte dërguar kurrë atë mesazh dhe as ndonjë mesazh të ngjashëm.

Zonja Mildon dikur ishte aleate e afërt e zotit Grenell, por marrëdhëniet mes tyre janë prishur për shkak të mosmarrëveshjeve të tij me bashkëshortin e saj aktual.

Zoti Grenell dhe zoti Mildon u takuan për herë të parë rreth fundit të vitit 2024.

Grenell tha se ata kishin zhvilluar disa biseda për çështje biznesore, por se marrëdhënia e tyre kishte qenë kryesisht shoqërore.

The New York Times raportoi më herët këtë javë se zoti Mildon rrezikon të humbasë biznesin e tij fitimprurës të çimentos në Venezuelë, për shkak të lidhjeve me rrethin e ngushtë të zotit Maduro, i cili ndodhet në paraburgim në Shtetet e Bashkuara, ku përballet me akuza për trafik droge.

Në veçanti, zyrtarët amerikanë dhe agjentët e inteligjencës kanë shqyrtuar marrëdhënien e zotit Mildon me personin që i dha kontratën e çimentos, një të besuar të Maduros të quajtur Alex Saab.

Zoti Mildon thotë se është 29 vjeç, por në dokumentet në Shtetet e Bashkuara dhe në regjistrat e kompanive në Britani figuron se është 25 vjeç. Ai refuzoi të komentonte këtë mospërputhje.

Para se Shtetet e Bashkuara ta kapnin zotin Maduro, ndihmës të Trumpit dhe disa zyrtarë të inteligjencës amerikane kishin shprehur shqetësime për bashkëpunimin e zotit Mildon me qeverinë e Maduros, sipas disa personave të informuar për këtë çështje.

Por, çka ndodhi nga Congo?

Hetimi i Shtëpisë së Bardhë për një mosmarrëveshje mes dy mbështetësve të njohur të Trumpit, Richard Grenell dhe Alina Habba Mildon, përqendrohet te një transfertë bankare nga Republika Demokratike e Kongos drejt një kompanie të pajisjeve të mbrojtjes në Teksas, thanë persona të njohur me çështjen.

Mildon kishte pranuar më herët, përmes një zëdhënësi, se shërben si këshilltar i presidentit të Kongos dhe se posedon pasaportë diplomatike të këtij vendi.

Zoti Mildon ka gjithashtu interesa të shumta biznesore në Venezuelë dhe kishte diskutuar për rolin e tij në atë vend me zotin Grenell. Në kohën kur u krye transferta bankare, Grenell shërbente si i dërguar i posaçëm i zotit Trump për Venezuelën.

Transferta u dërgua vitin e kaluar te TX-AT, një kompani teksane e sigurisë dhe mbrojtjes.

Zoti Grenell, i cili gjatë mandatit të parë të Trumpit kishte shërbyer si ambasador në Gjermani dhe drejtor në detyrë i inteligjencës kombëtare, kishte pranuar më herët se kishte punuar si konsulent për këtë kompani në vitin 2024. Por ai ka thënë se nuk kishte asnjë lidhje me të në kohën kur u krye transferta dhe ka mohuar çdo përfshirje në këtë pagesë.

Një mesazh tekstual i qershorit 2025, që pretendohet se është dërguar nga zoti Grenell, duket se përmban një pyetje lidhur me një pagesë për një “sistem softuerik”. Nuk është e qartë se cilit transaksion i referohet mesazhi, të cilin e ka shqyrtuar The New York Times.

Zoti Grenell e mohoi autenticitetin e mesazhit.

Qëllimi i marrëveshjes bazë të biznesit mbetet i paqartë.

TX-AT nuk iu përgjigj kërkesave të përsëritura për koment.

Zoti Mildon krijoi lidhje të fuqishme me elitat kongoleze dhe siguroi interesa të mëdha biznesore në këtë vend që nga mbërritja e tij atje në vitin 2021, kur ishte një sipërmarrës në të njëzetat e hershme. Ai ka thënë më parë se e kishte takuar presidentin kongolez, Félix Tshisekedi, në një aktivitet në Stamboll dhe se ishte nisur menjëherë me avion për të shqyrtuar mundësitë e investimit në këtë vend të pasur me burime natyrore.

Kompania e tij, Milvest, ka fituar që atëherë disa projekte të mëdha ndërtimore qeveritare, përfshirë Qendrën Financiare të Kinshasës.

Zoti Mildon ka thënë më parë se zotëron edhe miniera në Kongo.

Disa politikanë të lartë kongolezë morën pjesë në dasmën e zotit dhe zonjës Mildon, të mbajtur muajin e kaluar në hotelin Waldorf Astoria në Nju-Jork. Në ceremoni ishin të pranishëm edhe disa zyrtarë të lartë të administratës Trump. Mes tyre ishte Will Scharf, këshilltari ligjor i Shtëpisë së Bardhë, i cili po udhëheq hetimin e administratës për pagesën e kontestuar.

Ministria e Jashtme e Kongos nuk iu përgjigj kërkesës për koment.