Në vazhdën e vizitës zyrtare në Maqedoninë e Veriut, Kryetarja e Kuvendit të Republikës së Kosovës, Albulena Haxhiu, zhvilloi një takim me kryetarët e komunave me shumicë shqiptare.

Në takim u bisedua për shërbimet që banorët i presin çdo ditë nga komuna dhe për mundësitë që kanë të rinjtë për t’u shkolluar e për të punuar në vendlindje. U fol gjithashtu se si mund të bashkëpunojnë më shumë me komunat e Kosovës, duke nisur nga çështje konkrete, si përmirësimi i një shërbimi apo projektet e përbashkëta ndërkufitare.

“Të rinjtë nga komunat e dy vendeve mund të takohen më shpesh, përmes shkollave dhe organizatave kulturore”, theksoi Kryetarja Haxhiu, duke potencuar gjithashtu se në këto komuna, lidhjet me Kosovën janë pjesë e jetës së përditshme.

Ajo theksoi se studentët shkojnë e vijnë ndërmjet universiteteve në Prishtinë dhe në Tetovë, ndërsa shumë familje kanë të afërm në të dyja anët e kufirit.

Kryetarja e Kuvendit gjithashtu kujtoi mikpritjen e shqiptarëve të Maqedonisë për të dëbuarit me dhunë nga Kosova gjatë luftës.

“Në pranverën e vitit 1999, shumë familje në këto komuna i hapën dyert e shtëpive të tyre për të dëbuarit me dhunë nga Kosova gjatë luftës dhe ndanë me ta atë që kishin. Edhe sot, ata që gjetën strehë atë pranverë e kujtojnë me mirënjohje shtëpinë që i priti”, tha Kryetarja Haxhiu, duke shtuar se këto lidhje i kanë ndërtuar vetë shqiptarët, brez pas brezi, ndërsa detyra e institucioneve është t’i ruajnë dhe forcojnë ato.