Mijëra mbështetës të Donald Trump u mblodhën në Washington për të shprehur mbështetjen për përpjekjet e tij për ta ndryshuar rezultatin e zgjedhjeve presidenciale që i humbi, transmeton Gazeta Express.

Përleshjet midis mbështetësve dhe kundërshtarëve të Trump shpërthyen në mënyrë sporadike gjatë demonstratave dhe raporti i AP thotë se katër persona u dërguan në spital të plagosur me thikë, ndërsa, sipas të dhënave nga policia e qytetit të Uashingtonit, 23 u arrestuan.

Në llogarinë e tij në Twitter, Trump shprehu habi për mbledhjen e mbështetësve të tij në Uashington.

Zëri i Amerikës raportoi më parë se Trump u largua nga Shtëpia e Bardhë rreth mesditës me kohën lokale në rrugën për në Akademinë Ushtarake Amerikane dhe ndërsa helikopteri fluturoi mbi turmën e mbledhur në skelën kombëtare, u dëgjuan brohoritje për presidentin.

Michael Flynn, një ish këshilltar i sigurimit kombëtar, po fliste para mbështetësve të presidentit aktual në atë kohë.

Mbledhjet protestuese po mbahen në disa qytete amerikane përpara takimit të ardhshëm të anëtarëve të Kolegjit Zgjedhor, në të cilin Joe Biden do të zgjidhet zyrtarisht presidenti i 46-të i Shteteve të Bashkuara.