Aleksander Çeferin nuk do të jetë në garë për presidencën e FIFA-s në zgjedhjet që do të zhvillohen në mars të vitit 2027.

Këtë e ka konfirmuar vetë presidenti i UEFA-s, i cili foli në podcastin britanik “The Rest is Politics“, përcjell “Gazeta Express”.

Vendimi i tij e largon kështu mundësinë e një përballjeje të drejtpërdrejtë me Gianni Infantinon, presidentin aktual të organizatës botërore të futbollit. 

“Nuk jam i interesuar” për drejtimin e FIFA-s”, deklaroi Çeferin, duke shpjeguar se është i kënaqur me rolin që ka aktualisht në UEFA.

Drejtuesi slloven, president i shtëpisë së futbollit europian që prej vitit 2016, theksoi gjithashtu se pozicioni i tij si kundërshtar i Infantinos është më i besueshëm pikërisht sepse nuk synon ta zërë vendin e tij.

Mandati i Çeferinit në krye të UEFA-s do të përfundojë në vitin 2027 dhe, në moshën 58-vjeçare, ai ka lënë të kuptohet se dëshiron t’i kushtojë më shumë kohë jetës së tij private.

Ndërkohë, megjithatë, përplasja mes UEFA-s dhe FIFA-s mbetet e fortë.

UEFA ka kërcënuar me bojkotimin e kompeticioneve të organizuara nga federata botërore, përfshirë edhe Kupat e Botës, pas projektit – tashmë të braktisur – të Infantinos për përfshirjen e investitorëve privatë.

Çeferin e ka përsëritur kështu kërkesën për një ndryshim në drejtimin e FIFA-s.

Nëse Infantino vendos të rikandidojë, sipas presidentit të UEFA-s, mund të ketë një kandidat të gatshëm për ta sfiduar.

“Nuk e di ende kush”, saktësoi Çeferin, duke shtuar se nuk ka folur më me Infantinon që prej fillimit të krizës. /Gazeta Express