Kandidati për kryeministër nga Lidhja Demokratike e Kosovës, Lumir Abdixhiku, ka mbajtur takim me 150 bizneset më të mëdha në Kosovë, raporton Ekonomia Online.

Abdixhiku theksoi se i konsideron ata partnerë dhe si patriotë modern të zhvillimit të vendit.

“Ju konsideroj si partnerë, ju konsiderojë si patriotë modern të zhvillimit të vendit. Ju konsideroj si forca e vetme me të cilin mund ta shtroj vizionin tim përpara! Sepse ju konsideroj si partnerë dhe si patriotë modern të zhvillimit të vendit, ndjejë dhe përgjegjësi të ju takoj dhe t’ua shpalosi planet tona”, ka thënë Abdixhiku.

Abdixhiku tha se synim i LDK-së është rritja ekonomike prej 5 për qind, 5 miliardë euro buxhet si dhe 5 miliardë euro investime publike në vetëm katër vite.

“Atyre u prezantova projektet tona. 5 miliardë investime në 4 vjet. Jam i bindur, se teksa ne takohemi këtu, në moçalin e madh të pështymave të pushtetit, atë që çdo mëngjes na ushqen me vrer e urrejtje, do të ngritën zërat se si një politikan, takon biznese, takon oligarkë, takon hajdutë e mashtrues.Dhe në gjithë këtë errësirë të portretizuar të tyre, ushqejnë masat me urrejtje, me mllef e me kundërshti, ndaj secilën iniciative që ëndërron të krijojë diçka. Mos i merrni për budallenjë; jetërat e tyre, të familjeve të tyre, standardi i tyre, i pushimeve të tyre është shumë më i mirë e shumë më i lartë se i shumicës së bizneseve në vend”.

“Me njerëz të ndershëm, punëtorë, inovativ e kreativ – ata që ëndërrojnë vërtetë për një Kosovë që lundron në nivele krejt të tjera të zhvillimit ekonomik. Dua ta thyej dhe mendësinë e shkuar, të aferave korruptive, që në biznese shohin partnerë jo zhvillimorë, por partnerë akcionesh. Nuk ju shohin juve si mundësi zhvillimi, por aksionet tua si e drejtë përfitimi. Si ekonomist me profesion kuptoj gjithë sfidat tuaja. Si politikan me detyrë, kam obligim të shtroj rrugën e djathtë të Kosovës. Por si Kryetar i Lidhjes Demokratike të Kosovës, kam një mision më të madh se këto të dyja; atë të ndërtimit të një rruge të re për Republikën e Kosovës, një që ngjason vendin tonë me vendet normale të familjes evropiane” theksoi Abdixhiku.

“Dhe jam i bindur, i bindur siç bindeni secili prej jush që mundi i juaj i madh do të ketë sukses, se ky program i yni, me të gjithë angazhimin tonë pas shkurtit, do të transformojë rrënjësisht Kosovën në një vend që duhet ta kemi patjetër. Sepse, jam i lodhur që të jemi të fundit në Evropë. Jam i lodhur që të durojmë pozicionin tonë prej të fundit, në një kohë kur regjioni ynë ecë me hapa të jashtëzakonshëm, Evropa zhvillohet me tjetër vizion, e ne ngecemi në përballje të brendshme, të urrejtjes, ndarjes dhe propagandës. Si vend me vetëm 11 mijë metra katrorë, e me vetëm 1.6 milion banorë; prej të cilëve 600 mijë fëmijë, do të duhej të ishim në fluturim! Të ishim model, shembull të zhvillimit, progresit e vet jetës së mirë”, u shpreh Abdixhiku.