Trembëdhjetë ushtarë të Francës kanë vdekur në një aksident mes dy helikopterëve në kohën kur ata ishin angazhuar për t’i luftuar militantët në Mali të Afrikës. Kjo është humbja më e madhe e jetëve në ushtrinë franceze që nga fillimi i operacioneve në këtë shtet në vitin 2013.

Franca i ka angazhuar më shumë se 4500 trupa për të luftuar kundër militantëve islamikë në rajonin e Sahel-it, ku dhuna e militantëve të lidhur me Shtetin Islamik dhe Al-Qaeda-n është shtuar viteve të fundit.

“Presidenti njofton me pikëllim të thellë për vdekjen e 13 trupave franceze në Mali në mbrëmjen e 25 nëntorit në një aksident mes dy helikopterëve të tyre gjatë një operacioni kundër xhihadistëve”, thuhet në deklaratën e zyrës së presidentit francez, Emmanuel Macron.

Militantët po i shfrytëzojnë pjesët qendrore dhe veriore të Malit për të nisur sulme në rajonin e mbizotëruar nga shkretëtira, shkruan “Reuters”.